Idman.biz
"Yarışın ab-havası çox yaxşı idi".
Bunu İdman.biz-ə Azərbaycan millisinin cüdoçusu Rəşid Məmmədəliyev deyib.
O, Monteneqronun paytaxtı Podqoritsada keçirilən Avropa çempionatında çıxışını dəyərləndirib. 73 kq çəki dərəcəsində mübarizə aparan Məmmədəliyev bildirib ki, son anda heyətə daxil edilməsi ona heç bir çətinlik yaratmayıb: "Həm müəllimlərin, həm tibbi heyətin, həm də komanda yoldaşlarımın dəstəyi ilə yarışdan öncə çəki salmaq mənə rahat oldu. Yarışa gedəcəyimi son anda bilmək nəinki çətinlik yaratdı, əksinə, müsbət təsir göstərdi. Fikrimcə, bir ay öncədən biləndə ki, yarışda çıxış edəcəksən, bu adamı lap çox stressə salır. Ancaq bunu son anda bilmək məni bu sıxıntıdan xilas etdi. Düşünürdüm ki, itirəcəyim nəsə yoxdur, yarışdan maksimum həzz almalıyam".
Onun sözlərinə görə, ən çətin görüşləri 1/8 final mərhələsindən sonra başlayıb: "1/4 finalda fransalı Joan-Benjamin Qaba və yarımfinalda Danil Lavrentevlə görüşlər asan keçmədi. Hər ikisi çox təcrübəli idi. Ümumi rəqibləri dəyərləndirsəm, bəziləri ilə bundan öncəki yarışlarda qarşılaşmışdım. Digərlərini isə bundan öncəki yarışlarına baxıb analiz etmişəm. Həmin nəticələrə əsasən qurduğumuz plana uyğun olaraq güləşməyə çalışdım".
Cüdoçu Olimpiya çempionları Elnur Məmmədli və Hidayət Heydərovun onu dəstəkləməsinin əhəmiyyətini də vurğulayıb: "Görüşlər zamanı həm müəllimlərin, həm də tribunadan Olimpiya çempionlarımızın dediklərinə qulaq asır, çalışırdım ki, buna uyğun güləşim. Çünki onların təcrübəsi məndən daha çoxdur. Tribunada məni dəstəkləyənlərin olması böyük motivasiya oldu. Bu amil nailliyyət qazanmağıma kömək etdi".
Qeyd edək ki, Rəşid Məmmədəliyev Hidayət Heydərov xəstələndiyi üçün son anda millinin heyətinə cəlb olunmuşdu.
Aytac Sahəd
İdman.biz
