Idman.biz
"Hər şey hazırkı Olimpiya çempionu və eyni zamanda 2024-cü ildə qazandığı dünya çempionu titulunu müdafiə edəcək Zelim Kotsoyev ilə başlayacaq".
İdman.biz xəbər verir ki, Avropa Cüdo İttifaqı (EJU) iyunun 13-də Macarıstanın paytaxtı Budapeştdə start götürəcək dünya çempionatında 100 kq çəki dərəcəsində qüvvələr balansını belə qiymətləndirib.
Azərbaycan təmsilçisinin Olimpiya finalındakı rəqibi gürcüstanlı İliya Sulamanidze ilə görüşü səbirsizliklə gözlənilir: "100 kq çəki dərəcəsində kişilərin yarışında necə möhtəşəm heyət var! Burada ciddi qarşıdurmalar gözlənilir: Olimpiya, dünya və Avropa final qarşılaşmaları təkrarlana bilər. Kotsoyev həm Abu Dabidə, həm də Parisdə həyatının ən yaxşı çıxışını edən iki idmançıdan biri idi və bununla da Azərbaycanın güclü cüdo mərkəzlərindən biri olduğunu nümayiş etdirdilər.
Bununla belə, hamı onun hazırkı Avropa çempionu və Olimpiya Oyunlarının gümüş mükafatçısı İlia Sulamanidze ilə potensial revanş qarşılaşmasını səbirsizliklə gözləyir. Bu qarşıdurma unudulmaz rəqabətə çevriləcək kimi görünür".
İdman.biz
