Idman.biz
Macarıstanın paytaxtı Budapeştdə keçirilən cüdo üzrə dünya çempionatı başa çatıb.
İdman.biz xəbər verir ki, Azərbaycan millisinin 3 bürünc medal qazandığı mundial komandamız üçün bir sıra əlamətdar hadisələrlə yadda qalıb.
Dünya çempionatlarında qazanılan 3 medal dünya çempionatlarında say baxımından ən yaxşı 2-ci göstəricimiz olub. Ən yaxşı nəticəyə də məhz 2017-ci ildə Budapeştdə keçirilən mundialda imza atmışıq. Həmin vaxt cüdoçularımız 2 gümüş, 2 bürünc olmaqla 4 medal qazanıb.
Hər 3 medal kişi idmançılarımızın aktivinə yazılıb. Bu da kişilər arasında qazanılan medalların sayına görə rekordun təkrarıdır. 2017-ci ildəki dünya çempionatında da medalların üçünü də kişilər - Rüstəm Orucov, Orxan Səfərov və Elmar Qasımov əldə edib.
Budapeştdə fəxri kürsüyə yüksələn Zelim Tçkayev (81 kq) və Elcan Hacıyev (90 kq) karyeralarında ilk dəfə mundial medalı sevinci yaşayıb. Bununla da dünya çempionatlarında mükafat qazanan cüdoçu sayımız 20-yə çatıb.
Milli komandamız 24 ildən sonra dünya çempionatında 81 kq çəki dərəcəsində medal əldə edib. Bu çəkidə son medalımızı 2001-ci ildə Almaniyanın Münhen şəhərində keçirilən mundialda Elxan Rəcəbli (bürünc medal) qazanıb. Zelim Tçkayevin bürüncü 81 kq-da 2-ci medaldır.
Yığmamız 15 ildən sonra dünya çempionatında 90 kq-da fərqlənib. Bu çəkidə son medalımızı 2010-cu ildə Almaniyanın Münhen şəhərində keçirilən mundialda Elxan Məmmədov (bürünc medal) əldə edib.
Zelim Kotsoyev ardıcıl olaraq 4-cü dünya çempionatında fəxri kürsüyə yüksəlib. O, daha əvvəl – 2022-ci ildə Daşkənddə və 2023-cü ildə Dohada dünya üçüncüsü olub. Kotsoyev ötən il Abu-Dabidə isə 100 kq-da dünya çempionu adına yiyələnib. Olimpiya çempionumuz həm də dünya çempionatındakı medalların əyarına və sayına görə komanda yoldaşı Hidayət Heydərova çatıb. Heydərov da karyerasında dünya çempionatlarının 1 qızıl (2024, Abu-Dabi) və 3 bürünc (2018 - Bakı, 2019 - Tokio, 2022 - Daşkənd) medalını əldə edib.
Mundialda kişilər arasında 7 çəki dərəcəsinin 5-də (60 kq və +100 kq istisna olmaqla) son Olimpiya çempionları mundiala qatılıb. Onlardan heç biri qızıla sahib ola bilməyib. Yalnız Hifumi Abe (Yaponiya, 66 kq) və Zelim Kotsoyev (100 kq) bürünc medala yiyələnib. 81 kq-da 2 qat Olimpiya çempionu Takanori Naqase (Yaponiya) ilk görüşündə, 90 kq-da 2 qat Olimpiya çempionu Laşa Bekauri (Gürcüstan) ikinci qarşılaşmasında məğlub olaraq mötəbər turniri medalsız başa vurub. Qadınlar arasında son Olimpiya çempionlarından 2-si mundialda iştirak edib. Onlardan Beatriz Souza (Braziliya, +78 kq) ikinci görüşündə uduzaraq medalsız qalıb. Son Olimpiya çempionlarından yalnız Alice Bellandi (78 kq, İtaliya) dünya çempionu olub.
Ümumiyyətlə, dünya çempionatında mübarizələr olduqca gərgin keçib. 14 çəki dərəcəsinin 10-da yeni dünya çempionları (5 kişi, 5 qadın) olub.
İdmançılarımızın bəziləri hesabda öndə olduqları görüşləri uduzublar. Bu da bəzi nüanslarda cüdoçularımızın nisbətən geri qalmasından xəbər verir və bu detallar üzərində işlənilməlidir. Əhməd Yusifov (60 kq) 1/16 finalda Paris-2024-ün üçüncüsü Ryuju Naqayama (Yaponiya) ilə, Elcan Hacıyev (90 kq) yarımfinalda Goki Tajima (Yaponiya) ilə, Vüqar Talıbov (90 kq) 1/32 finalda Luka Maysuradze (Gürcüstan) ilə, Uşanqi Kokauri (+100 kq) üçüncü yer uğrunda Temur Raximovla (Özbəkistan) görüşlərdə hesabda öndə olsalar da, qarşılaşmalardan məğlub ayrılıblar.
Əhməd Yusifovun (-60 kq) 1/16 finalda uduzduğu Ryuju Naqayama və Ruslan Paşayevin (66 kq) 1/8 finalda uduzduğu Takaşi Takeoka (Yaponiya) sonda dünya çempionu olublar.
Milli komandamız 3 bürüncdən savayı, bir 5-ci yer (Uşanqi Kokauri) və bir 7-ci yer (Rəşid Məmmədəliyev) də əldə edib. Bu da diqqətəlayiq nəticələrdir.
Həmçinin, yığmada gənc cüdoçular var. Belə desək, komanda yenidən formalaşdırır. Əsas hədəfimiz isə gələn il Bakıda keçiriləcək dünya çempionatında yaxşı çıxış etməkdir. Eləcə də, bu dünya çempionatı yeni Olimpiya tsiklinin ilk mundialı idi. Buna görə də əldə edilən 3 bürünc medal gələcəyə ümidlə baxmağa əsas verir.
Hüseyn Vaqif
İdman.biz
