Idman.biz
Azərbaycan Cüdo Federasiyası ilə Azərbaycan İdman Akademiyasının birgə əməkdaşlığı çərçivəsində həyata keçirilən birinci səviyyə – məşqçilərin sertifikatlaşdırılması proqramı üzrə seminarlar yekunlaşıb.
İdman.Biz xəbər verir ki, proqramın sonunda təlimi uğurla başa vuran iştirakçılar üçün son mərhələ olaraq praktiki imtahanlar təşkil olunub. İmtahanlar zamanı məşqçilərin əsas texniki bilikləri, məşq prosesinin düzgün qurulması, metodiki yanaşmaları və təhlükəsizlik qaydalarına əməl etmə bacarıqları real məşq şəraitində yoxlanılıb. Qiymətləndirmə beynəlxalq standartlara uyğun metodologiya əsasında aparılıb.
Qeyd edək ki, Azərbaycan Cüdo Federasiyası və Azərbaycan İdman Akademiyası arasında həyata keçirilən bu əməkdaşlıq məşqçilərin peşəkar inkişafının dəstəklənməsinə, vahid metodiki sistemin formalaşdırılmasına və ölkədə cüdo idman növünün davamlı inkişafına mühüm töhfə verir.
