Idman.biz
Azərbaycanlı cüdoçular ili böyük medal qəniməti ilə başa vurublar. Böyüklər, yeniyetmələr, gənclər və veteranlar səviyyəsində komandaların nəticələrini qeydə alan "Judoinside" portalının məlumatına görə, idmançılarımızın aktivində ümumilikdə 205 mükafat var.
Bu medalların 59-u qızıl, 48-i gümüş, 98-i isə bürüncdür.
İdman.Biz xəbər verir ki, təkcə əsas yığmaların deyil, həm də aşağı yaş qruplarının nəticələrinin cəmləndiyi bu statistika inkişaf göstəricisini aydın şəkildə nümayiş etdirir. Üstəlik, bəzi idmançılarımız eyni anda bir neçə yaş kateqoriyasında fərqləniblər. Xüsusilə Kənan Nəsibov (+100 kq) əvvəlcə 23 yaşadək idmançılar arasında Avropa çempionatında qələbə qazanıb, daha sonra isə Zaqreb Qran-Prisində birinci yeri tutub.
Bir neçə turnirdə Azərbaycan komandası ümumi hesabda qalib olub. Xüsusilə Qvadalaxara Qran-Prisində əldə olunan nəticə diqqət çəkir – altı qızıl və üç bürünc medal. Meksikadakı bu qələbə Olimpiadadan sonra Hidayət Heydərov (73 kq) üçün ilk uğur olub. Eyni zamanda Yay Oyunlarının digər qalibi Zelim Kotsoyev (100 kq), eləcə də Balabəy Ağayev (60 kq), Ruslan Paşayev (66 kq), Vüsal Qaləndərzadə (81 kq) və Uşangi Kokauri (+100 kq) fəxri kürsünün ən yüksək pilləsinə qalxıblar.
Maraqlıdır ki, təkcə ilin birinci yarısında azərbaycanlı cüdoçular beynəlxalq arenada 94 medal (32 qızıl, 31 gümüş, 61 bürünc) qazanıblar. Medal kolleksiyası Skopyedə keçirilən kadetlər arasında Avropa çempionatında xüsusilə zənginləşib. Yığmamız bu yarışdan üç qızıl, bir gümüş və üç bürünc medalla qayıdıb. Anar Quliyev (50 kq), Rəsul Əlizadə (55 kq) və Zeyd Ələsgərov (60 kq) çempion olublar, Nərmin Ağamirzazadə (48 kq) ikinci yeri tutub, Gülşən Hüseynova (44 kq) və Leyla Ələkbərova (48 kq) isə ilk üçlüyə düşüblər.
İlin nəticələrinin mühüm tərkib hissələrindən biri də Dünya Turundakı çıxışlar olub.
Reytinq turnirləri cüdoçularımıza 33 medal (11 qızıl, 6 gümüş, 16 bürünc) qazandırıb. "Böyük dəbilqə" seriyasına gəldikdə, Parisdə Ruslan Paşayev (66 kq) qalib olub, Bakıda Zelim Tskayev (81 kq) çempionluq sevinci yaşayıb, Düşənbədə Balabəy Ağayev (60 kq) birinci yeri tutub, Astanada isə Elcan Hacıyev (90 kq) zədədən sonra möhtəşəm qayıdış edərək qalib gəlib.
Bununla yanaşı, qadınlar arasında qazanılan medalların sayı da artıb. Kənül Əliyeva (48 kq) Lima Qran-Prisində ilk üçlüyə düşüb, daha sonra İslam Həmrəyliyi Oyunlarında ikinci yeri tutub. Həmin yarışda Südabə Ağayeva (70 kq) qalib olub. Ər-Riyadda keçirilən turnirdə isə Aydan Vəliyeva (52 kq) bürünc medal qazanıb.
İlin ümumi yekunlarına əsasən, Azərbaycan cüdo üzrə medal sıralamasında 12-ci yeri tutub. Birinci pillədə inanılmaz göstəricilərlə Fransa qərarlaşıb – 187 qızıl, 170 gümüş və 268 bürünc medal. İkinci yerdə Braziliya (101-72-128), ilk üçlüyü isə Beynəlxalq Cüdo Federasiyasının bayrağı altında çıxış edən idmançılar (99-58-121) tamamlayır.
