Idman.biz
Avstriyanın Qrats şəhərində keçirilən cüdo üzrə gənclər arasında Avropa Kubokunda Azərbaycan millisi uğurlu çıxışı ilə diqqət çəkib.
İdman.Biz xəbər verir ki, komandamız turnirin son günündə daha dörd medal qazanıb. 90 kq çəki dərəcəsində çıxış edən Süleyman Şükürov bütün rəqiblərini məğlub edərək fəxri kürsünün ən yüksək pilləsinə qalxıb.
Eyni çəkidə mübarizə aparan Aslan Kotsoyev də yarışı bürünc medalla tamamlayıb. 81 kq-da Roman Qarayev, 100 kq-da isə Ramazan Əhmədov üçüncü yeri tutublar.
Qeyd edək ki, yarışın ilk günündə Məhəmməd Musayev 66 kq çəki dərəcəsində çempion olub. Beləliklə, Azərbaycan millisi Qrats Avropa Kubokunu iki qızıl və üç bürünc medalla başa vurub.
Beləliklə, Avropa Kubokunu iki qızıl və üç bürünc medalla tamamlayan Azərbaycan millisi 34 ölkə arasında oğlanların mübarizəsində ikinci, ümumi medal sıralamasında isə üçüncü yeri tutub.
11:22
Azərbaycanın gənc cüdoçusu Məhəmməd Musayev Avstriyanın Qrats şəhərində keçirilən gənclər arasında Avropa Kubokunda qızıl medal qazanıb.
İdman.Biz Azərbaycan Cüdo Federasiyasının mətbuat xidmətinə istinadən xəbər verir ki, 66 kq çəki dərəcəsində çıxış edən idmançımız yarışın ilk gününü çempion kimi başa vurub.
Musayev finaladək Almaniya, Xorvatiya, Belçika və Macarıstan təmsilçilərini mübarizədən kənarlaşdırıb. O, həlledici görüşdə Serbiya cüdoçusu Marko Yorqiçi ipponla məğlub edərək fəxri kürsünün ən yüksək pilləsinə qalxıb.
Ölkəmiz turnirdə 11 çəki dərəcəsində 26 cüdoçu (16 oğlan, 10 qız) ilə təmsil olunur. Kollektivə gənc oğlanlardan ibarət yığmanın baş məşqçisi Rüstəm Alimli, məşqçi Elxan Rəcəbli, qadınlardan ibarət yığmanın böyük məşqçi Saşa Herkenrat-Vimar və yeniyetmə qızlardan ibarət yığmanın baş məşqçisi Elnur İsmayılov rəhbərlik edir.
Beynəlxalq turnirdə 34 ölkədən 676 idmançı (420 oğlan, 256 qız) mübarizə aparır. Yarışın ədalət təmsilçiləri arasında Azərbaycan Cüdo Federasiyasının hakimlər heyətinin üzvü, A kateqoriyalı beynəlxalq dərəcəli hakim Arzu Acalova da yer alıb.
Aktivində bir qızıl medal olan Azərbaycan millisi ilk yarış günündən sonra oğlanlar arasında medal sıralamasında birinci, ümumi hesabda isə beşinci pillədə qərarlaşıb.
