Cüdo üzrə kəmər dərəcələrinin müəyyənləşdirilməsi məqsədilə növbəti rəsmi imtahan keçirilib. Noyabrın 21-də milli komandaların Cüdo Federasiyasının Təlim-Məşq Mərkəzində təşkil olunan sınaqda 200 idmançı iştirak edib.
İdman.Biz xəbər verir ki, Federasiyasının təşkil etdiyi imtahanda iştirakçılar yaş qruplarına uyğun olaraq beş kəmər dərəcəsi üzrə bilik və bacarıqlarını nümayiş etdiriblər.
Cüdoçular sarı, narıncı, yaşıl, göy və qəhvəyi kəmər dərəcələri üçün müəyyənləşdirilən texniki tapşırıqları yerinə yetiriblər. İmtahan meyarlarını uğurla qarşılayan idmançılar müvafiq kəmər və sertifikatlarla təltif olunublar.
Kəmər imtahanları cüdoçuların texniki hazırlığının mərhələli şəkildə qiymətləndirilməsi, mənimsədikləri bacarıqların möhkəmləndirilməsi və növbəti inkişaf pilləsinə keçməsi baxımından əhəmiyyət daşıyır.
Müvafiq kəmər dərəcəsinə sahib olmaq həm də bir sıra mühüm ölkədaxili yarışlarda iştirak üçün əsas tələblərdən biri hesab olunur.