Idman.biz
Cüdoçularımız artıq yeni il başlayan kimi tam proqram üzrə məşqlərini davam etdirir, yarışlara hazırlaşırlar.
Artıq sabah Avstriyanın Mittersill şəhərində Avropa Cüdo İttifaqının (EJU) təlim-məşq düşərgəsinə start veriləcək.
Azərbaycan millisi ənənəyə uyğun olaraq mövsümə hazırlıq bazasını məhz burada formalaşdıracaq. Ümumilikdə düşərgəyə 50 ölkədən 900-dən çox idmançının qatılması gözlənilir.
İdman.Biz xəbər verir ki, ilin əsas hadisəsi oktyabrın 4–11-də Bakıda keçiriləcək dünya çempionatı olacaq. Mövsüm eyni zamanda olimpiya təsnifat mərhələsinin başlanması ilə də əlamətdar olacaq. Bu baxımdan Azərbaycan cüdoçularını qarşıda hansı yarışların gözlədiyi barədə danışmaq üçün ən uyğun zamandır. Üstəlik, yarış təqvimi artıq təsdiqlənib.
Ənənəyə görə, Cüdo üzrə Dünya Turu fevralın 7-8-də Parisdə keçiriləcək "Böyük Dəbilqə" turniri ilə açılacaq. Seriya ümumilikdə on mərhələdən ibarət olacaq və Daşkənd, Tbilisi, Düşənbə, Astana, Lozanna, Ulan-Bator, Budapeşt, Abu-Dabi və Tokioda təşkil ediləcək. Bu il "Böyük Dəbilqə" turnirlərinin təşkilatçıları sırasında Bakının olmaması isə təəccüblü deyil. Çünki bütün diqqət dünya çempionatının yüksək səviyyədə keçirilməsinə yönəldiləcək.
Bununla yanaşı, Qran-pri seriyasına daxil olan dörd turnir də baş tutacaq. Cüdoçular Linz, Lima, Tsindao və Zaqrebdə keçiriləcək yarışlarda beynəlxalq arenada öz güclərini sınamaq və dünya reytinqində irəliləmək imkanı qazanacaqlar.
Eyni zamanda ilin əsas yarışından əvvəl Ulan-Batorda iyunun 19–21-də "Böyük Dəbilqə" turniri keçiriləcək. Beynəlxalq Cüdo Federasiyası (IJF) bu yarışı təsadüfən önə çıxarmır, çünki o, 2028-ci ildə Los-Ancelesdə keçiriləcək Olimpiya Oyunlarına ilk təsnifat turniri olacaq. Məhz bu andan etibarən Dünya Turunun hər bir yarışı daha böyük əhəmiyyət daşıyacaq və gərginlik Bakıda keçiriləcək dünya çempionatında pik həddə çatacaq. Burada dünya titulları və son dərəcə vacib reytinq xalları uğrunda mübarizə aparılacaq.
Təqvimdə bütün yaş qrupları üzrə dünya çempionatları da yer alıb. Yeniyetmələr arasında dünya çempionatı avqustun 20–23-də Ekvadorun Qvayakil şəhərində keçiriləcək. Gənclər arasında ilin əsas yarışı isə oktyabrın 22–25-də İordaniyanın Amman şəhərində baş tutacaq. Noyabr ayında isə gənc idmançılar Seneqalın Dakar şəhərində təşkil olunacaq Gənclər Olimpiya Oyunlarında çıxış edəcəklər.
Dünya Turu mərhələləri və dünya çempionatları ilə yanaşı, 2026-cı il qitə ittifaqlarının himayəsi altında keçirilən çoxsaylı Open seriyalı turnirlərlə də zəngin olacaq. Bu yarışlar idmançılara vacib reytinq xalları qazandırır və olimpiya təsnifatına gedən yolda mühüm rol oynayır. Mövsümə həmçinin veteranlar arasında və kata üzrə dünya çempionatları da daxil edilib. Bu yarışlar hər il daha çox iştirakçı və həvəskar cəlb etməklə cüdonun ruhunun yaş həddi tanımadığını bir daha sübut edir.
