Idman.biz
Azərbaycanın qadın boksçusu Gülər Hüseynova Dakarda keçirilən Yeniyetmələrin dördüncü Yay Olimpiya Oyunlarında qazandığı gümüş medal barədə təəssüratlarını bölüşüb.
İdman.Biz xəbər verir ki, idmançı boks üzrə bu yarışlarda ölkə tarixində medal qazanan ilk qız olub.
Gülər Hüseynova turnirdə üç döyüş keçirərək inamlı çıxışla finala yüksəlib. Həlledici qarşılaşmada isə gərgin mübarizədə Venesuela təmsilçisinə uduzub.
"Şükürlər olsun ki, finala yüksələ bildim. Azərbaycan idmanı üçün tarixi nəticəyə imza ataraq ölkəmizə yeniyetmələrin Olimpiya Oyunlarında qadın boksu üzrə ilk medalı qazandırdım. Finalda rəqibimlə hər ikimiz güclü idik, lakin həmin gün qələbə ona nəsib oldu. Bu yolda mənə dəstək olan ailəmə, şəxsi məşqçim Hüseyn Ağayevə və baş məşqçim İlkin Ağayevə gördükləri bütün işlərə görə dərin minnətdarlığımı bildirirəm", – deyə boksçu bildirib.
Gənc idmançı yarışın təşkilatçılığını və Seneqal sakinlərinin qonaqpərvərliyini də yüksək qiymətləndirib. O, əldə etdiyi nəticə ilə kifayətlənmək niyyətində olmadığını və gələcəkdə daha böyük uğurlara imza atmağa çalışacağını vurğulayıb.
Qeyd edək ki, Gülər Hüseynova 51 kq çəki dərəcəsində mübarizə aparıb. O, finalda Venesuela təmsilçisi Qrenyellis Qarsiyaya məğlub olaraq Olimpiadanı gümüş medalla başa vurub.
