Idman.biz
Bu gün, dekabrın 16-da basketbol üzrə "Sabah" klubu FIBA Çempionlar Liqasının B qrupunun son turunda səfərdə "Alba" ilə qarşılaşacaq.
İdman.Biz-in məlumatına görə, görüş Berlindəki "Uber Arena"da keçiriləcək və Bakı vaxtı ilə saat 23:00-da başlayacaq.
Azərbaycan təmsilçisi üçün turnir cədvəlindəki vəziyyət son dərəcə aydındır və yerli basketbol üçün artıq tanış olan ssenarini xatırladır. B qrupunda "Alba" və "Şalon"un hərəsinin dörd qələbə, bir məğlubiyyəti var. "Nimburk" və "Sabah" isə bir qələbə, dörd məğlubiyyətlə eyni göstəriciyə malikdir. Qrupun qalibi birbaşa 1/8 finala yüksəlir, ikinci və üçüncü yerləri tutan komandalar isə pley-in mərhələsində mübarizəni davam etdirmək şansı qazanır.
Beləliklə, "Sabah" elə bir vəziyyətə düşüb ki, təkcə yaxşı oyun deyil, mütləq qələbə lazımdır. Üstəlik, bu qələbə belə növbəti mərhələyə vəsiqəni avtomatik təmin etmir. Bakı klubu yalnız bir halda qrupda üçüncü yeri tuta bilər: Berlində "Alba" üzərində qələbə və paralel olaraq "Nimburk"un "Şalon"a məğlub olması. İstənilən digər nəticə "Sabah" üçün dördüncü yer və avrokubok mövsümünün başa çatması deməkdir.
Xatırladaq ki, komandalar arasında Bakıda keçirilən ilk oyunda Rimas Kurtinaytisin rəhbərlik etdiyi kollektiv "Alba"ya 76:85 hesabı ilə uduzub.
Simvolik məqam ondan ibarətdir ki, 12 ildən artıq müddət əvvəl Azərbaycan milli komandası demək olar ki, eyni vəziyyətlə üzləşmişdi. 2013-cü il Avropa çempionatının seçmə mərhələsində yığmamız da həlledici səfər oyununa Almaniyada çıxmışdı və yalnız qələbənin mübarizəni davam etdirmək şansı verdiyini anlayırdı.
2012-ci il sentyabrın 11-də Oldenburqda, "EWE Arena"da Azərbaycan millisi Almaniya yığması ilə qarşılaşıb və 68:81 hesabı ilə məğlub olub. Bununla belə, azərbaycanlı basketbolçular üç period boyunca rəqiblə bərabər mübarizə aparıb, yalnız son hissədə təzyiqə tab gətirə bilməyiblər.
Nəticədə Almaniya seçmə mərhələni məğlubiyyətsiz başa vurub, Azərbaycan isə 4 qələbə, 4 məğlubiyyətlə finişə çataraq əlavə göstəricilərə görə İsveçdən geri qalıb və final mərhələsindən kənarda qalıb.
Bu gün "Sabah" da Almaniyada eyni emosional və turnir kontekstində meydana çıxır: "ya qələbə, ya mövsümün sonu" formatında. Fərq yalnız qarşıya qoyulan məqsədin miqyasındadır - söhbət milli komandalar üçün qitə turnirinə vəsiqədən yox, pley-in mərhələsinə yüksələrək avrokubok mövsümünü uzatmaq şansından gedir. Lakin 12 ildən sonra Berlində Azərbaycan basketbolu üçün dejavu hissi demək olar ki, tamdır.
Teymur Tuşiyev
