Idman.biz
Azərbaycanın basketbol klubu "Sabah" yeni baş məşqçi ilə müqavilə bağlayıb.
İdman.Biz xəbər verir ki, Serbiya mətbuatının yaydığı məlumata görə, Azərbaycanın dördqat çempionu artıq 33 yaşlı serbiyalı mütəxəssis Lazar Spasiçlə anlaşma əldə edib.
Məlum olub ki, Avropanın ən perspektivli basketbol məşqçilərindən biri hesab olunan Spasiçlə müqavilə üç il müddətinə nəzərdə tutulub.
Xatırladaq ki, gənc mütəxəssisin son iş yeri Almaniyanın "Oldenburq" klubu olub. O, burada əvvəlcə baş məşqçinin köməkçisi kimi fəaliyyət göstərib, daha sonra isə komandanın sükanı arxasına keçərək klubun Almaniya çempionatındakı vəziyyətini əhəmiyyətli dərəcədə yaxşılaşdırıb.
Əlavə edək ki, ötən həftə "Sabah" tanınmış litvalı mütəxəssis Rimas Kurtinaytisin baş məşqçi postundan ayrıldığını açıqlayıb. O, fəaliyyətini Litva millisində davam etdirmək qərarı verib.
