Idman.biz
Azərbaycanın "Sabah" basketbol klubu heyətini amerikalı müdafiəçi Cerri Bleykslə gücləndirib.
Bu barədə İdman.Biz-ə komanda daxilindəki mənbə məlumat verib.
31 yaşlı və 1,93 metr boya malik basketbolçu Avropada kifayət qədər təcrübəyə sahibdir. O, dinamik hücumçu kimi tanınır və həm birinci, həm də ikinci nömrəli mövqelərdə oynamaq bacarığına malikdir. Karyerası ərzində Cerri Bleyks Avropa və Çin kimi güclü liqalarda çıxış edib, İsveç çempionu olub, həmçinin "Arizona State" Universitetinin komandasında təhsil alıb və oynamışdır.
C. Bleyksin transferi "Sabah"ın xarici mövqelərdə rotasiyasını genişləndirir və FİBA Çempionlar Liqasında Fransa təmsilçisi "Şalon"a qarşı keçiriləcək qarşılaşma öncəsi komandanın hücum potensialını artıracaq. Bu görüş bu gün Milli Gimnastika Arenasında Bakı vaxtı ilə saat 20:00-da başlayacaq.
Qeyd edək ki, "Sabah" qısa müddət əvvəl digər amerikalı basketbolçusu Castin Tillmanı zədə səbəbindən itirib. Klub onun dekabr ayında meydana qayıdacağına ümid edir. Cerri Bleyksin komandaya qoşulması bu itkini qismən kompensasiya etməli və komandanın perimetrdə daha aqressiv oyun sərgiləməsinə kömək etməlidir.
Teymur Tuşiyev
