Idman.biz
"Turan"ın qadınlardan ibarət voleybol komandasının kapitanı Ayşən Əbdüləzimova CEV Çempionlar Liqasının ikinci təsnifat mərhələsində Xorvatiyanın "Mladost" klubu üzərində qazandıqları qələbəni şərh edib.
İdman.Biz-in Tovuza ezam olunmuş əməkdaşına açıqlama verən komandanın kapitanı ilk oyunun həyəcanından və cavab qarşılaşmasına hazırlıqdan danışıb:
"İlk oyun, ilk qələbə. İlk həyəcan. Ən önəmlisi qələbə idi. Bunu da bacardıq. İkinci oyuna daha yaxşı hazırlaşmalıyıq. Ən vacibi cavab qarşılaşmasıdır. İlk səfər onlar üçün çətin olacaq.
Bu gözəl günlərdə bizə dəstək olan rəhbərliyimizə və hər kəsə təşəkkürümü bildirmək istəyirəm".
Rəqibin oyunundakı boşluqları görüb-görmədikləri ilə bağlı suala cavab verən Əbdüləzimova komandasının daha yaxşı hazırlaşmalı olduğunu vurğulayıb:
"Əslində, rəqib istədiyimiz və gözlədiyimiz taktika ilə oynadı. Düşünürəm ki, bir az daha yaxşı hazırlaşmalıyıq, çünki bəzi boşluqlarımız olur".
Qeyd edək ki, "Turan" bu gün CEV Çempionlar Liqasının ikinci təsnifat mərhələsinin ilk oyununda "Mladost"u 3:0 hesabı ilə məğlub edərək turnirə qələbə ilə başlayıb. Komandalar arasında cavab qarşılaşması oktyabrın 29-da Xorvatiyada keçiriləcək.
