Sport24.az
FİDE şahmatçıların yeni reytinq cədvəli açıqlayıb. Sport24.az xəbər verir ki, sentyabr ayı üçün müəyyənləşən "Top-100"də Azərbaycanın 7 şahmatçısı yer alıb.
Şahmatçılarımızdan yenə ən yaxşı göstərici Şəhriyar Məmmədyarova məxsusdur. 5 pillə geriləyən qrossmeysterimiz 2741 xalla 16-cı yerdə qərarlaşıb.
Bir rəqibini özündən irəli buraxan Teymur Rəcəbov (2692) 38-ci yerə enib. Rauf Məmmədov (2651) da 5 pillə geriləyib – 70-ci yer. Eltac Səfərli (2630) isə "100"ü "99"a dəyişib.
Cədvələ 2839 xalla norveçli Maqnus Karlsen başçılıq edir.
Qadınların cədvəlində ən yaxşı təmsilçimiz Günay Məmmədzadədir. 2390 reytinq xalına malik şahmatçı 1 pillə irəliləyərək 51-ci yerə yüksəlib.
Ülviyyə Fətəliyeva (2385) 13, Gövhər Beydullayeva (2368) 2 pillə yuxarı qalxıb. Onlar müvafiq olaraq, 58-ci və 72-ci yerdədirlər.
Qadınların reytinq cədvəlinə çinli Yifan Hou başçılıq edir – 2609 xal.
