Idman.biz
Bu gün, oktyabrın 27-də Astanada keçirilən güləş üzrə dünya çempionatında yunan-Roma güləşi yarışlarına yekun vurulacaq. Yarışların son günündə Azərbaycan millisinin daha üç medal qazanmaq şansı var. Onlardan biri qızıl, ikisi isə bürünc medal ola bilər.
İdman.Biz xəbər verir ki, 63 kq çəki dərəcəsində dünya çempionu Nihat Məmmədli finalda Ermənistan təmsilçisi Karen Aslanyanla qarşılaşacaq. İdmançılar 2024-cü ildə Tiranada keçirilən dünya çempionatında da üz-üzə gəliblər. Həmin vaxt yarımfinalda rəqibini 6:1 hesabı ilə məğlub edən Azərbaycan güləşçisi daha sonra turnirin qızıl medalını qazanıb. Bu dəfə də qalib gəlsə, Məmmədli ikinci dəfə dünya çempionu olacaq.
67 kq çəki dərəcəsində mübarizə aparan Həsrət Cəfərov isə bürünc medal uğrunda güləşəcək. O, ötən gün yarımfinalda İran təmsilçisi, Olimpiya çempionu Səid Esmailiyə əlavə göstəricilərə əsasən 1:1 hesabı ilə məğlub olub. Cəfərovun rəqibi təsəlliverici görüşlərin nəticələrinə əsasən müəyyənləşəcək. Bu mərhələdə Niderland təmsilçisi İlyas Laauina, Çin güləşçisi Cin Sinxin və Qazaxıstan idmançısı Bağdat Sabaz mübarizə aparacaqlar.
87 kq çəki dərəcəsində çıxış edən İslam Abbasov da bürünc medal qazanmaq şansını qoruyur. O, 1/8 finalda Bolqarıstanı təmsil edən Olimpiya çempionu Semyon Novikova 5:6 hesabı ilə uduzub və təsəlliverici görüşlərdə mübarizəyə başlayacaq. Abbasov ilk olaraq Amerika Samoası təmsilçisi Latana Sopa ilə qarşılaşacaq. Qələbə qazanacağı təqdirdə onu Gürcüstan güləşçisi Laşa Qobadze ilə görüş gözləyir. Bu mərhələni də keçərsə, Azərbaycan idmançısı Özbəkistan təmsilçisi Məhəmmədqodir Rasulovla bürünc medal uğrunda mübarizə aparmaq imkanı əldə edəcək.
Qeyd edək ki, Abbasovla Qobadze daha əvvəl də qarşılaşıblar. Onların son təsdiqlənmiş görüşü 2023-cü il aprelin 22-də Zaqrebdə keçirilən Avropa çempionatında baş tutub. Həmin vaxt bürünc medal uğrunda görüşdə gürcüstanlı güləşçi 3:0 hesabı ilə qalib gəlib. Tərəflər 2021-ci il dünya çempionatında da üz-üzə gəliblər və Qobadze həmin görüşdə 11:0 hesabı ilə qələbə qazanıb.
Təsəlliverici görüşlər Bakı vaxtı ilə saat 09:30-da, medal qarşılaşmaları isə saat 17:00-da başlayacaq.
Xatırladaq ki, Azərbaycan millisinin Astanada keçirilən dünya çempionatında indiyədək iki qızıl medalı var. Eldəniz Əzizli (55 kq) və Sənan Süleymanov (77 kq) dünya çempionu olublar.
