Idman.biz
Rusiya Qılıncoynatma Federasiyasının prezidenti İlqar Məmmədov bildirib ki, Tunisdə Qran-pri mükafatını qazanan rusiyalı qılıncoynadan Alina Mixaylova Avropa və dünya çempionatlarında Rusiya komandasının tərkibində olmaq üçün ortaya ciddi iddia qoyub.
İdman.Biz bildirir ki, bazar günü Mixaylova Tunisdə keçirilən Qran-pridə qızıl medal qazanıb.
"Əlbəttə ki, qələbələr həmişə sevincdir. Xüsusilə də uzun müddətdir baş vermədikdə. Keçən payız Əlcəzairdə üçüncü yeri tutdu və indi birincidir. Üstəlik, o, 15:14 qələbə qazanıb və bu da qılıncoynatmada tək bir zərbənin qiymətinin çox yüksək olduğunu sübut edib. Qılıncoynatma daim inkişaf edir və biz daim qalib gəlməliyik. Mixaylova möhtəşəm Olimpiya çempionlarımızın da yarışdığı turnirlərdə qalib gəlir. İstəyirəm ki, böyüklərin təcrübəsi gənc idmançıların inkişaf etdirdiyi bacarıqla birləşdirilsin. Axı biz komanda yarışları vasitəsilə Olimpiadaya vəsiqə qazanırıq, buna görə də bu çox vacibdir.
Alina bu mövsüm növbəti böyük turnirlərdə - Avropa və dünya çempionatlarında komandada olmaq üçün ortaya ciddi bir iddia qoyub. Qadın qılıncoynatma üzrə "media ulduzlarımız" üçün onun qələbəsi narahatlıq doğurur. Komanda tərkibini müəyyən edən seçim meyarlarımız var. Və əgər işlər belə davam edərsə, onlar bu turnirlərə vəsiqə qazana bilməyəcəklər. Hər halda, hamımız Alinanı təbrik edirik və ümid edirik ki, bu, beynəlxalq səviyyədə daha böyük qələbələrə doğru yalnız ilk addımdır", - deyə Məmmədov "Match TV"yə bildirib.
