Dünya çempionatı: 3 bürünc şansı

Albaniyanın paytaxtı Tiranada qeyri-olimpiya çəkiləri üzrə dünya çempionatı davam edir.

İdman.biz xəbər verir ki, bu gün mundialda sərbəst güləşçilər mübarizəyə başlayıb.

Azərbaycan güləşçiləri 4 çəki dərəcəsində xalçaya çıxıblar.

Dünya çempionatı
Sərbəst güləş
61 kq
Nurəddin Novruzov 1/8 finalda Ahmet Dumanla (Türkiyə) üz-üzə gəlib. Görüş rəqibin 14:4 hesablı qələbəsi ilə başa çatıb. Duman finala yüksəldiyindən Peter Hammer (Kosta-Rika) olacaq.

70 kq
Kənan Heybətov ilk mərhələdə Maniş Qoşvamiyə (Hindistan) tam üstünlüklə (10:0) qalib gələrək 1/8 finala vəsiqə qazanıb. O, bu mərhələdə İnalbek Şeriyevə (AİN) uduzaraq, mübarizəni dayandırıb.

79 kq
Orxan Abasov startda ermənistanlı Arman Avaqyanla güləşib. Təmsilçimiz rəqibini xalçaya çıxmağa peşman edib və 4:0 hesabı ilə qələbə qazanıb. Orxan 1/8 finalda Maqomed Maqomayevə 1:7 hesabı ilə uduzub. Təsəlliverici görüşlərə qatılacaq güləşçimiz Suldxu Olonbayarla (Monqolustan) güləşəcək.

92 kq
Abubakr Abakarov ilk qarşılaşmasında Redjeb Haydari ilə (Şimali Makedoniya) münasibətinə aydınlıq gətirib. Təmsilçimiz tam üstünlüklə (10:0) qalib gələrək 1/8 finala yüksəlib. Abakarov növbəti görüşündə Abdulraşid Sadullayevə (AİN) 1:3 hesabı ilə uduzub. Onun rəqibi finala yüksəldiyindən Abubakr bürünc uğrunda Devid Teylorla (ABŞ) yarışacaq.

Qeyd edək ki, mundialda yunan-Roma güləşçilərimizdən Eldəniz Əzizli (55 kq), Nihat Məmmədli (63 kq) və Ülvü Qənizadə (72 kq) qızıl medal qazanıb.

İdman.biz