Sport24.az
Azərbaycan futzal millisinin və Qazaxıstanın "Astana" klubunun qapıçısı Rövşən Hüseynli yığmadan kənarlaşdırılmasına münasibət bildirib. Sport24.az xəbər verir ki, o, bu barədə özünün Feysbuk hesabında yazıb.
Hüseynli yaşananlara belə şərh edib: "Ardıcıl iki oyundan sonra yola çıxmaq çətin olsa da, 6 aprel 03:00 reysi ilə Astanadan Bakıya yola düşdüm. Səhər saat 7-8-də evə çatdım, axşam 21:00-23:00 məşqində iştirak etdim. Məşqdən sonra başa düşülən məlum məsələləri deyib növbəti gün saat 12:00-dakı məşqə gələrək "komandaya qoşula bilərəmmi" deyə müraciət etdim. "Yox" cavabı aldım, mən də səbəbləri izah edib evə getdim. Hazır məşq etmək üçün tez gəldiyim halda indi intizamsızlıqla kənardayam. Milli komandaya hər zaman layiqincə xidmət etmişəm. Dəvət aldığım müddətdə də belə davam edəcək. Mənim ümumi 20 illik, peşəkar 16 illik karyeramda işlədiyim hər bir rəhbər, məşqçi, idarə heyəti, komanda yoldaşlarımdan kimsə deyə bilməz ki, Rövşən 1 dəfə də olsun intizamsızlıq edib".
Qeyd edək ki, milli komandanın baş məşqçisi Vitali Borisov mətbuata verdiyi açıqlamada Rövşən Hüseynlini intizam qaydalarını pozduğuna görə düşərgədən kənarlaşdırdığını deyib.
