Sport24.az
AFFA-nın Apellyasiya Arbitraj Tribunalının iclası keçirilib. Sport24.az xəbər verir ki, bunu assosiasiyanın mətbuat xidməti açıqlayıb.
"Neftçi" İK-nın futzalçısı Emin Həsənzadənin barəsində verilən qərardan şikayəti təmin edilməyib. Futzal üzrə Yüksək Liqanın "Şuşa" ilə matçında təcavüzkar davranış səbəbindən birbaşa qırmızı vərəqə ilə meydandan kənarlaşdırıldığı üçün 4 oyun cəzalanan oyunçu ilə bağlı qərar dəyişməz qalıb.
"Şəfa"nın futbolçusu Ebru Əmirova barəsində verilən qərardan şikayəti də təmin olunmayıb. U-15 Qızlar liqasının 1/4 final mərhələsinin "Ümid"lə matçında rəqib komandanın rəsmi şəxsini təhqir etdiyinə görə birbaşa qırmızı vərəqə alaraq meydandan kənarlaşdırılan futbolçunun 4 oyunluq diskvalifikasiyası qüvvədə saxlanılıb.
"Şamaxı"nın şikayəti qismən təmin olunub. U-15 Liqasının "Metak"la oyununda adı protokolda qeyd edilməyən, lakin qeydiyyatda olan məşqçi Vüqar Süleymanov meydana daxil olaraq rəqbin bir neçə azyaşlı futbolçusunu yumruqla vurduğuna görə 1 il müddətinə futbolla bağlı hər hansı fəaliyyətdən məhrum edilməsi, müstəsna hal olaraq 500 manat cərimə edilməsi, komandanın növbəti ev oyunu azarkeşsiz keçirilməsi barəsində qərar ləğv olunub. Hadisəyə düzgün hüquqi qiymət verilməsi üçün İntizam Komitəsinə qaytarılıb.
