Idman.biz
"Çexiya yığmasına qarşı əla oyun nümayiş etdirdik. Rəqib sonadək döyüşdü".
İdman.biz xəbər verir ki, bu sözləri AZƏRTAC-a açıqlamasında minifutbol üzrə Monteneqro millisinin oyunçusu Qoran Neneziç Bakıda keçirilən dünya çempionatının yarımfinal mərhələsinə yüksəlmələri barədə danışarkən deyib.
O, yaxşı müdafiə xəttinə sahib olduqlarını bildirib: "Düşünürəm ki, turnirdə ən yaxşı müdafiəsi olan komandayıq. Çexiya ilə görüşdə də bu mövqeydə etibarlı olduğumuzu göstərdik. Bir qol hər şeyi həll etdi".
Neneziç yarımfinalda qarşılaşacaqları Azərbaycan millisi barədə də danışıb: "Azərbaycan yığması möhkəm komandadır. Hazırda onları dünyanın ən yaxşısı hesab edirəm. Amma bizim də əla müdafiəmiz var. Uğurlu nəticə qazana bilərik".
Onun sözlərinə görə, mundialın keçirildiyi Milli Gimnastika Arenasında şərait idealdır: "Dünya çempionatı üçün möhtəşəm hazırlıq görülüb. Milli komanda ilə ilk turnirimdir. Bu cür atmosferdə oynamaq bizə əlavə stimul verir".
Qeyd edək ki, Azərbaycan millisi Monteneqro ilə bu gün saat 20:00-da üz-üzə gələcək.
