Sport24.az
"İsveçə dünən gəldik və yorğun olmağımıza baxmayaraq, məşqimizi etdik. Futzalçıların əhval-ruhiyyəsi yaxşıdır". Sport24.az xəbər verir ki, bunu Azərbaycan millisinin futzalçısı Emin Kürdov deyib.
Yığmanın kapitanı Avropa çempionatının əsas mərhələsinin İsveçlə sabah keçiriləcək oyunu ərəfəsində azfutzal.az-a açıqlama verib:
"Hər birimiz istəyirik ki, qrupda ilk qələbəmizi qazanaq. Milli komandamız buna layiqdir. Oyunöncəsi son məşqimizdə taktiki tapşırıqlar üzərində işləyəcəyik.
Heyətimizdə mikrozədəlilər var. Həmin zədələr onların oynamağına mane olmayacaq".
Qolkiper bildirib ki, yığmamız reytinq xalları üçün mübarizə aparacaq:
"İsveç uyğunlaşdığı örtükdə oynayacaq. Biz də reytinq xallarımızı artırmaq üçün əlimizdən gələni edəcəyik. Çünki reytinqdəki sıralama gələcək püşkatmalar üçün lazım olacaq. Bütün diqqətimizi bu görüşə yönəldəcəyik. Düzdür, Bakıya döndükdən 2 gün sonra Xorvatiya yığması ilə qarşılaşacağıq. Amma bu oyun haqda sonra danışmaq olar.
Bu gün baş məşqçi tərəfindən videogörüntülər təqdim olunacaq. Rəqibin zəif və güclü tərəflərini izləyəcəyik. Oyunun keçiriləcəyi arenanın örtüyü də bizim əlehimizədir. Çünki terafleksdə məşq etməmişik. Belə örtükdə oynamaq ağır olur, top sürətlə hərəkət etmir. Bunu bəhanə etmirik. İlk məşqimizi keçirdik, ikinci məşq də uyğunlaşmaq baxımından çox köməyimizə çatacaq".
Qeyd edək ki, İsveç – Azərbaycan oyunu aprelin 11-də keçiriləcək.
