Idman.biz
Bakıda keçirilən minifutbol üzrə dünya çempionatında Avropa komandaları aşkar üstün nəticələr nümayiş etdirirlər. Qrup mərhələsindən sonra bu qənaətə gəlmək olar – 1/8 final mərhələsinə "Qoca qitə"dən 14 komanda vəsiqə qazanıb. Digər qitə təmsilçilərindən isə müarizəni yalnız Mavritaniya (Afrika) və Tailand (Asiya ) davam etdirirlər.
İdman.biz xəbər verir ki, 1/8 final mərhələsində bəzi cütlüklər kifayət qədər maraqlı alınıb.
Məsələn, Azərbaycan yığması hazırkı dünya çempionu Rumıniya ilə qarşılaşacaq. Bununla belə, turnirin gedişi göstərdi ki, titullu komandalar da Bakıda oyun və nəticə baxımından çətinliklər yaşaya bilirlər. Misal üçün, bir vaxtlar dünya çempionu olmuş ABŞ komandası bu dəfə qrupdan çıxa bilmədi: bir heç-heçə və iki məğlubiyyətlə kifayətləndi.
Təbii ki, pley-off matçlarının özünəməxsusluğu var – bir səhv, bir epizod oyunun taleyini həll edə bilər. Buna görə də komandaların daha ehtiyatlı oynaması gözlənilir. Belə hallarda psixoloji amil də ön plana çıxır və əlbəttə, Azərbaycan futbolçuları üçün doğma meydan faktoru həlledici rol oynaya bilər.
Qrup mərhələsində cəmi iki komanda maksimum xal toplayıb – Portuqaliya və Serbiya. Onlar keçirdikləri hər üç oyunda qələbə qazanıblar. Xüsusilə portuqaliyalılar yüksək məhsuldarlıq nümayiş etdiriblər: 13 qol vurub, öz qapılarından cəmi 2 top buraxıblar. Nəticədə bombardirlər yarışına 6 qolla portuqaliyalı Tiaqo başçılıq edir.
Pley-off mərhələsində kifayət qədər özünəməxsus komandalar yer alıb. Məsələn, Gürcüstan qrupda inamlı çıxış edərək Argentinanı beş top fərqi ilə məğlub edib.
Bir qədər gözlənilməz nəticə isə Bosniya və Herseqovinanın öz qrupunda birinci yeri tutması oldu. Bu qrupda Polşa, Qazaxıstan və ABŞ da yer alırdı. Amerikalılar üzərində qələbədən sonra bosniyalılar iki heç-heçə ilə kifayətləndilər və bu nəticə də onlara qrup liderliyi üçün bəs etdi. Qazaxıstan isə ikinci yeri tutan Polşadan cəmi bir xal geri qaldı.
1/8 final mərhələsinin təqvimi elə tərtib olunub ki, bütün oyunlar iki gün ərzində baş tutacaq. Bu da o deməkdir ki, sabah gecə yarısına yaxın bütün 1/4 finalçılar məlum olacaq. Ümid edirik ki, onların arasında Azərbaycan yığması da olacaq.
Zəki Feyzullayev
İdman.biz
