Idman.biz
"Yanvardan sonra yeni məşqçi təyin etmişik. Güman edirəm ki, Yevgeni Kukseviçin rəhbərliyi altında ilkin mərhələni keçməyə nail olacayıq. Hazırda 5 yeni oyunçu ilə danışıqlarımız gedir".
İdman.biz xəbər verir ki, bu sözləri Sport24.az-a açıqlamasında "Araz-Naxçıvan" futzal klubunun vitse-prezidenti Mahmud Sadıqov deyib.
Təcrübəli funksioner Naxçıvan təmsilçisinin Çempionlar Liqasına hazırlıqla bağlı planlarını da açıqlayıb: "Yəqin ki, yeni transferlər iyunun sonlarına yaxın komandaya qoşulacaqlar. 10 günlük təlim-məşq toplanışımız olacaq. Ondan sonra isə gündəlik məşqlərə çıxacağıq. Növbəti ayın əvvəlində püşkatma olacaq, rəqiblərimiz bilinəcək. Ona uyğun hazırlığımız davam edəcək. Çox güman komanda ölkə xaricində də toplanış keçəcək. Hazırlıq dönəmində həm xarici, həm də yerli komandalarla yoxlama görüşləri də nəzərdə tutulub".
Qeyd edək ki, tarixində 19-cu çempionluğu bayram edən "Araz-Naxçıvan" 2025-2026-cı il mövsümündə ölkəmizi UEFA Çempionlar Liqasında təmsil edəcək. "Araz-Naxçıvan"ın rəqibləri iyulun 3-də keçiriləcək püşkatmada bəlli olacaq.
İdman.biz
