Sport24.az
"Qış fasiləsinə qədər olan nəticələri uğursuz hesab etmirəm. Ən azı ilk "beşlik"də yer almağı planlaşdırırdıq". Bu sözləri Sport24.az-a açıqlamasında"Zaqatala"nın baş məşqçisi Rüstəm Məmmədov deyib.
Təcrübəli mütəxəssisin sözlərinə görə, qış fasiləsindən sonra maliyyə çətinlikləri səbəbindən oyunçular oyunlara istə nilən şəkildə köklənə bilməyiblər:
"Lakin qış fasiləsindən sonra müəyyən maliyyə problemləri yarandı. Sponsorların ayrılması komandaya ciddi təsir etdi və bundan sonra çətinliklər başladı. Futbolçuların oyuna köklənməsində problemlər yaşanırdı. Bir müddət sonra vəziyyət qismən düzəlsə də, artıq komandanın motivasiyasını geri qaytarmaq çətin idi. Həm də hansı yer uğrunda mübarizə apardığımız tam aydın deyildi. Rəqiblərimiz bizdən xeyli uzaqlaşmışdı. Digər tərəfdən, sonuncu pilləyə düşmək təhlükəsi də real görünmürdü. Bu səbəbdən futbolçularda əlavə motivasiya yaranmırdı".
Məmmədov müqaviləsinin başa çatdığını, bəzi təkliflərin olduğunu da vurğulayıb:
"Klubla müqaviləm başa çatıb. Müəyyən təkliflər olsa da, hələ heç bir komanda ilə danışıq aparmamışam. Hazırda bütün klublar yeni mövsüm üçün ayrılacaq büdcəni gözləyirlər. Bundan sonra hansısa komanda ilə danışıq aparmaq mümkün olacaq. "Zaqatala"da qalacağım halda, növbəti mövsüm daha iddialı komanda qurmaq məsələsi təkcə məndən asılı deyil. Məşqçi istəyə bilər, amma büdcə yoxdursa, heç nə etmək mümkün deyil. İstədiyin transferləri həyata keçirə bilsən, iddialı komanda formalaşdırmaq olar. Bu isə yalnız məşqçidən deyil, əsasən klubun imkanlarından asılıdır".
Qeyd edək ki, "Zaqatala" Birinci Liqada mövsümü 28 xalla 7-ci pillədə bitirib.
