Idman.biz
"Türkiyə futbolunun dünya çempionatı kimi nüfuzlu turnirdə uğur qazanması üçün köklü dəyişikliklərə ehtiyac var. Bu istiqamətdə düzgün strategiya müəyyənləşdirilməlidir".
Bu sözləri türkiyəli tanınmış mütəxəssis Yılmaz Vural ölkəsinin 2026-cı il dünya çempionatına vəsiqə qazanması ilə bağlı danışarkən deyib.
O bildirib ki, Türkiyə yığması turnirdə Avstraliya, Paraqvay və ABŞ kimi fərqli qitələri təmsil edən komandalarla qarşılaşacaq.
"Bu rəqiblərin hər biri özünəməxsus xüsusiyyətlərə malikdir. ABŞ futbolu son illərdə inkişaf etsə də, ölkədə əsas idman növü sayılmır. Bununla belə, ev sahibi amili onların üstünlüklərindən biridir. Paraqvay Cənubi Amerika təmsilçisi kimi güclü rəqiblərlə oynamağa alışıb, Avstraliyada isə futbol yeni inkişaf mərhələsindədir. Bu baxımdan Türkiyə millisinin şanslarını yüksək qiymətləndirirəm", - deyə o, AZƏRTAC-a açıqlamasında söyləyib.
Mütəxəssis vurğulayıb ki, komandanın əsas problemi kollektiv oyunla bağlıdır: "Fərdi keyfiyyətləri yüksək olan futbolçularımız var. Arda Gülər, Hakan Çalhanoğlu və digərlərinin adlarını çəkmək olar. Onlar Avropanın aparıcı klublarında çıxış edir və böyük təcrübəyə malikdirlər. Lakin komanda oyunu baxımından müəyyən çətinliklər yaşayırıq. Son oyunlarda qələbələr daha çox fərdi ustalıq hesabına qazanılıb".
O qeyd edib ki, qarşıdakı müddətdə bu istiqamətdə ciddi iş aparılmalıdır: "Əgər komanda şəklində oyunumuzu inkişaf etdirə bilsək, daha böyük uğurlar qazanmaq mümkündür. Topa nəzarəti artırmalı və daha sistemli oyun sərgiləməliyik. Əks halda yüksək səviyyəli turnirlərdə uğur əldə etmək çətin olacaq".
Y.Vural əlavə edib ki, Türkiyə millisinin dünya çempionatındakı çıxışı turnirin marağını daha da artıracaq: "Dünyanın müxtəlif ölkələrində yaşayan çoxsaylı türklər komandaya böyük dəstək verəcək və bu da yarışa əlavə rəng qatacaq. Hətta mən də komandamıza dəstək olmaq üçün ABŞ-yə yollanacağam".
Mütəxəssis həmçinin futbolun idarə olunması ilə bağlı problemlərə də toxunub. Onun sözlərinə görə, bəzi ölkələr bu sahədə islahatlar apararaq uğur qazansa da, Türkiyə və ardıcıl üçüncü dəfədir dünya çempionatından kənarda qalan İtaliyada problemlər tam həllini tapmayıb: "Futbol cəmiyyət üçün birləşdirici rol oynayır. Bu sahədə düzgün idarəetmə və vahid yanaşma formalaşdırmaq vacibdir. Təəssüf ki, biz hələ də bu məsələlərdə istənilən nəticəyə nail ola bilməmişik".
Qeyd edək ki, ABŞ, Kanada və Meksikanın birgə ev sahibliyi edəcəyi dünya çempionatı iyunun 11-dən iyulun 19-dək keçiriləcək. Mundialda ilk dəfə 48 ölkənin yığması mübarizə aparacaq.
24 ildən sonra yenidən mundiala vəsiqə qazanan Türkiyə millisinin qrup mərhələsində keçirəcəyi matçların təqvimi də bəlli olub. D qrupunda yer alan "ay-ulduzlular" iyunun 14-də Avstraliya, 20-də Paraqvay, 26-da isə ev sahiblərindən ABŞ ilə qarşılaşacaq. İlk iki görüş Bakı vaxtı ilə saat 08:00-da, sonuncu qrup oyunu isə 06:00-da başlayacaq.
