Idman.biz
Almaniyanın "Ayntraxt" klubu baş məşqçi vəzifəsi üçün Xabi Alonsonu əsas namizədlərdən biri kimi nəzərdən keçirir.
İdman.Biz xəbər verir ki, bu barədə Almaniyanın nüfuzlu "Bild" nəşri məlumat yayıb.
Mənbənin yazdığına görə, Dino Toppmöllerin istefasından sonra boş qalan baş məşqçi postu üçün klub rəhbərliyi ispan mütəxəssisi prestijli seçim kimi qiymətləndirir. Xüsusilə idman direktoru Markus Kretşe Xabi Alonso ilə görüşərək mümkün əməkdaşlıq imkanlarını müzakirə etmək istəyir.
Məlumata görə, "Ayntraxt"ın bu qərarı son turda "Verder Bremen"lə 3:3 hesablı heç-heçədən və ümumilikdə uğursuz nəticələr seriyasından sonra verilib. Bundesliqada 18 turdan sonra 39 qol buraxan Frankfurt təmsilçisi turnir cədvəlində yeddinci pillədə qərarlaşıb və müdafiədəki problemlər rəhbərliyi dəyişiklik etməyə vadar edib.
"Bild" qeyd edir ki, Çempionlar Liqasında mübarizəni davam etdirən "Ayntraxt"ın siyahısında Edin Terziç, Marko Roze və Roqer Şmidt kimi alternativ namizədlər də var. Lakin əsas məqsəd Xabi Alonsonu Almaniyaya qayıtmağa razı salmaqdır. Bununla belə, nəşr bu transferin reallaşma ehtimalını "çətin və demək olar ki, mümkünsüz" kimi dəyərləndirir.
Xatırladaq ki, UEFA Çempionlar Liqasının əsas mərhələsi çərçivəsində "Qarabağ" - "Ayntraxt" qarşılaşması yanvarın 21-də saat 21:45-də Tofiq Bəhramov adına Respublika stadionunda keçiriləcək.
