Idman.biz
"Bu sualın cavabı əsasən baş məşqçimizə aiddir. Mən isə məşqlərdə və oyunlarda əlimdən gələni etməyə çalışdım".
Bunu Albaniyanın "Partizani" klubunda çıxış edən Azərbaycan millisinin yarımmüdafiəçisi Vüsal İsgəndərli futbolinfo.az-a müsahibəsində deyib.
2 illik fasilən sonra yığmaya çağrılan 31 yaşlı futbolçu həm bu barədə təəssüratları, "FIFA Series-2026" turnirinin qalibi olmaları, həm də digər sualları cavablandırıb.
Həmin müsahibəni təqdim edirik.
– "FIFA Series" turnirində qalib olmağınızla bağlı təəssüratlarınızı bilmək istərdik. Hər iki oyun haqqında fikirləriniz necədir?
– Əlbəttə, bu turnirdə çempion olmağı çox istədik. Buna nail olduğumuz üçün çox xoşbəxtəm. İlk rəqib güc baxımından fərqli olsa da, ikinci rəqib doğrudan da çox yaxşı kollektiv idi.
– Hər iki oyunda meydana çıxdınız və qol vurdunuz. Əvvəlcədən buna hazırlaşmışdınız? Baş məşqçi Ayxan Abbasovla söhbətiniz oldumu və sizə tövsiyələri nə oldu?
– Baş məşqçimiz Ayxan Abbasovla əvvəldən "Zirə"də işləmək imkanım olmuşdu. Bu səbəbdən onun sisteminə bələd idim. Məşqdə, oyunda nələri etməli olduğumu bilirdim. Oyundan əvvəl məşqlərdə əlimdən gələni edirdim ki, şans qazanım. Baş məşqçimiz də mənə bu şansı verdi.
– Penaltilər seriyası ilə bağlı baş məşqçi Ayxan Abbasov qeyd etdi ki, azərbaycanlı futbolçuların qol vurması onu sevindirib. Penalti zərbələrini kimin yerinə yetirəcəyini əvvəlcədən məşqçi müəyyənləşdirmişdi, yoxsa özünüz təşəbbüs göstərdiniz?
– Bəli, bu, baş məşqçinin qərarı idi. Hər kəs oyunda və penalti seriyasında qalib gəlmək istəyi göstərdi, bu da çox sevindirici haldır.
– Uzun müddətdən sonra milliyə çağırılmağınız və oyunlarda iştirak etməyiniz sizə necə təsir etdi? Özünüzü tam göstərə bildinizmi? Bu performansdan sonra sentyabrda Millətlər Liqası oyunlarına dəvət alacağınıza inanırsınız?
– Bu sualın cavabı əsasən baş məşqçimizə aiddir. Mən isə məşqlərdə və oyunlarda əlimdən gələni etməyə çalışdım. Qarşıda daha iki yoldaşlıq oyunumuz var, sonra Millətlər Liqası başlayacaq. O vaxta qədər formamı daha da yaxşılaşdırmaq və yayda olan toplanışa dəvət almaq istəyirəm.
– Turnirin qalibi olduqdan sonra sosial şəbəkələrdə müxtəlif fikirlər səsləndi. Bu şərhlərə münasibətiniz necədir? Ümumiyyətlə, bu turnir sizə nə qazandırdı?
– Mənim şəxsi fikrim budur ki, milli komandada Azərbaycan bayrağı altında çıxış ediriksə, hər qələbə, hər qol əziz və önəmlidir. Turnirin qalibi Azərbaycan oldu və bu ən vacib məsələdir. Biz həmişə ölkəmizi ən yaxşı şəkildə təmsil edib xalqımızı sevindirmək istəyirik.
– Bu oyunlardan sonra "Partizani"də hədəfləriniz nədir?
– Əlbəttə, motivasiyam çox yüksəkdir. Artıq "Partizani"yə köklənmişəm. Buradakı işimiz UEFA-da oynamaq və avrokuboklara vəsiqə qazanmaqdır. Milli komandadakı bu uğur mənim üçün böyük motivasiyadır.
