Sport24.az
"Napoli"nin keçmiş hücumçusu Viktor Osimhen əfsanəvi Dieqo Maradonanın hələ də Neapol futbolu tarixində xüsusi yer tutduğunu etiraf edib. Nigeriyalı oyunçunun sözlərinə görə, Maradonanın klubun tarixinə verdiyi töhfə misilsizdir. Sport24.az xəbər verir ki, hazırda "Qalatasaray"ın formasını geyinən forvard bu barədə "The Touchline" nəşrinə açıqlama verib:
"Sabah ölmək istəmirsənsə, onun barəsində pis söz danışa bilməzsən. Neapolda heç kim Dieqo Maradona haqqında neqativ fikir səsləndirməyə cəsarət etmir.
Beş Çempionlar Liqası və beş liqa çempionluğunu qazansanız belə, vaxtınızı boşa sərf edəcəksiniz - yenə də Napoli azarkeşlərinin qəlbində Maradonanı əvəz edə bilməyəcəksiniz".
Qeyd edək ki, Argentina futbolunun əfsanəsi 1984-1991-ci illər aralığında Neapol klubunun formasını geyinib. O, "Napoli"nin heyətində meydana çıxdığı 188 matçda rəqib qapılarından 81 top keçirib. Maradona bu klubla iki dəfə İtaliya çempionluğunu bayram edib.
