"Çempionatın son turunda qələbə qazanıb mövsümü major notlarla tamamlamaq istəyirik. Təbii ki, nəticələrimiz ürəkaçan deyil. Ötən həftə "Qəbələ"yə məğlub olduq. Halbuki, səfərdə qələbə qazanıb vəziyyətimizi yaxşılaşdırmaq istəyirdik. Təəssüf ki, istədiyimizə nail ola bilmədik. Çətin olsa da, "Qarabağ"la matçda aktivimizə 3 xal yazdırıb çempionatı 8-ci pillədə başa vurmaq istəyirik. Yeganə motivasiyamız budur". Bu sözləri Sport24.az-a açıqlamasında "Araz-Naxçıvan"ın futbolçusu Turan Manafov deyib.
25 yaşlı müdafiəçi karyerası ilə bağlı danışarkən hələ heç nəyin bilinmədiyini vurğulayıb: "Yayda "Araz-Naxçıvan"la anlaşmam bitir. Klub rəhbərliyindən yeni müqavilə ilə bağlı xəbər yoxdu. Ümid edirəm ki, çempionat bitəndən sonra yeni təkliflərim olacaq".
Qeyd edək ki, Manafov cari mövsümdə "Araz-Naxçıvan"ın heyətində ölkə kuboku da daxil olmaqla 36 oyuna çıxıb. Müdafiəçinin aktivində 3 qol və 3 məhsuldar ötürmə var.
POLAD AZƏR