Idman.biz
"Qəbələ" Birinci Liqa təmsilçisi "Baku Sportinq"ə böyük hesabla qalib gəlib.
İdman.Biz xəbər verir ki, Bakı Olimpiya Stadionunun ehtiyat meydanında baş tutan qarşılaşmada Kaxaber Tsxadadzenin rəhbərlik etdiyi kollektiv "Baku Sportinq" üzərində 7:1 hesablı qələbə qazanıb.
Matçdan sonra "Qəbələ"nin baş məşqçisi Kaxaber Tsxadadze yoxlama oyunlarının əhəmiyyəti ilə bağlı fikirlərini bölüşüb. Mütəxəssis bildirib ki, əsas məqsəd nəticə deyil, futbolçuların verilən tapşırıqları necə yerinə yetirməsidir.
Tsxadadzenin sözlərinə görə, komanda çox qol vurmasına baxmayaraq, belə oyunlarda hesab ön planda olmamalıdır. O, müəyyən səhvlərin olduğunu və onların aradan qaldırılması üzərində işləyəcəklərini vurğulayıb. Baş məşqçi əlavə edib ki, çempionatın başlamasına cəmi bir həftə qalıb və bu müddətdə maksimal dərəcədə yaxşı hazırlaşmaq vacibdir.
Mütəxəssis həmçinin qeyd edib ki, iki futbolçu - Xayme Syerra və İbrahima Sanqare cəzalı olduqları üçün "Şamaxı" ilə keçiriləcək matçda komandaya kömək edə bilməyəcəklər.
Tsxadadze sonda yoxlama oyunları ilə rəsmi çempionat qarşılaşmaları arasında böyük fərq olduğunu xatırladaraq, bu tip matçlardakı nəticələrin futbolçuları və məşqçi heyətini aldatmamalı olduğunu bildirib.
