Idman.biz
Təbrizin "Traktor" klubu İran çempionatında iştirakını dayandıra bilər.
İdman.Biz bildirir ki, "Traktor" klubunun sahibi Məhəmmədrza Zənnuzi-Mütləq bu barədə bəyanatı yayıb.
O, bəyanatından İran Futbol Federasiyasının rəhbəri Mehdi Tacı klub ətrafındakı proseslərə müdaxilə etməyə, əks halda isə istefa verməyə çağırıb. Klub sahibi FIFA-ya müraciət edəcəklərini istisna etməyib.
Bəyanatın mətni klubun sosial media hesablarında yayılıb.
"Cənab Tac ya İran futbolunu idarə etmək gücünə malikdir, ya da əgər bu gücü yoxdursa, istefa verməlidir. Əgər bu proses belə davam edəcəksə, "Traktor" klubunun bu liqada qalması üçün heç bir səbəb qalmayacaq. Ədalətli şəkildə idarə olunması mümkün olmayan bir futbolun ümumiyyətlə dayandırılması daha yaxşıdır.
"Traktor" klubu xərc çəkmir ki, bəziləri pis idarəetmə ilə öz mənafelərini təmin etsin, bunun müqabilində isə bizim azarkeşlərimiz etnik şüarların hədəfinə çevrilsin. Bu şüarlar ya federasiyanın səssizliyi ilə qarşılanır, ya da bəzən onun qurumları tərəfindən görməzdən gəlinir. Bu davranışlar qəbuledilməzdir.
Hakimliklərin mühəndisliyindən tutmuş bir çox planlaşdırmalara qədər hər şey elə aparılır ki, sanki "Traktor"un əleyhinə dizayn edilib. Bəzi texniki məsələlərdən keçmək olar, amma etnik təhqirlərdən əsla. Nə mən, nə də "Traktor" azarkeşləri bu mövzunu heç vaxt unutmayacağıq.
Təəssüf doğurur ki, bir nəfərə ünvanlanan bir təhqirə görə "Traktor" misli görünməmiş cəzalarla üzləşir, amma ötən mövsüm müxtəlif stadionlarda "Traktora", onun futbolçularına və ən əsası türklərə qarşı etnik təhqirlər səsləndirildi və federasiya heç bir ciddi addım atmadı. Bu ikili yanaşma açıq-aşkar ədalətsizliyin nümunəsidir.
Sözüm cənab Taca və Futbol Federasiyasında yer alan hər kəsədir: "Traktor"un İran futboluna yad bir parça olduğunu düşünməsinlər. Bu cür idarəolunmazlıq, istər istəmədən, istərsə də bilərəkdən, ölkə xalqları arasında parçalanmanı dərinləşdirir. Əgər bu vəziyyəti düzəltmək gücünüz yoxdursa, məsuliyyəti başqasına verin.
Ya bu futbol islah olunacaq, ya da "Traktor" klubu geri çəkiləcək və öz hüquqlarını bərpa etmək üçün hüquqi və beynəlxalq yollarla, o cümlədən FIFA vasitəsilə addımlar atacaq. Bu ölkənin xalqları etnik şüarlardan bezib və artıq bu vəziyyətə dözmək istəmir", - bəyanatda deyilir.
