Idman.biz
"Barselona"nın sabiq prezidentliyə namizədi Toni Freyşa Madrid "Real"ının prezidenti Florentino Peresin gələcəyi ilə bağlı açıqlama verib.
İdman.Biz xəbər verir ki, Freyşa "La Porteria" proqramında çıxışı zamanı "Real"ın bu mövsüm də böyük titullardan məhrum qalacağı təqdirdə Peresin istefa verə biləcəyini bildirib.
"Bu, çox çətin olacaq. Artıq iki il keçib və "Barselona" daha da güclənir. Futbol baxımından burada mübahisə ediləcək heç nə yoxdur. İki komanda arasındakı fərq çox böyükdür. Əgər buna üçüncü il də əlavə olunarsa... "Real"ın dörd əsas kubokdan heç birini üç mövsüm ardıcıl qazana bilmədiyi sonuncu dəfə hər şey Florentino Peresin istefası ilə başa çatmışdı. Mənim bu mövsümün sonu üçün proqnozum budur", - deyə Freyşa bildirib.
O, Peresin 2006-cı ildə "Real" prezidentliyindən ilk dəfə ayrılmasını da xatırladıb. Freyşanın fikrincə, bu mövsüm titulların qazanılmaması Madrid klubunun rəhbərinə təzyiqi yenidən artıra bilər.
Qeyd edək ki, Freyşanın sözləri onun şəxsi proqnozudur. Florentino Peres postunu tərk etmək niyyətində olduğunu açıqlamayıb.
