Idman.biz
İngiltərə futbol millisinin baş məşqçisi Tomas Tuxel komandadakı gələcəyi ilə bağlı qərarını açıqlayıb.
İdman.Biz "Sky Sports"a istinadən xəbər verir ki, 52 yaşlı mütəxəssis DÇ-2026-nın yarımfinalında Argentinaya 1:2 hesablı məğlubiyyətdən sonra vəzifəsindən ayrılmayacağını bildirib. Tuxelin müqaviləsi AVRO-2028-in sonunadək qüvvədədir.
"Evdə keçiriləcək Avropa çempionatınadək müqavilə üzrə fəaliyyətimizi davam etdirəcəyik. İndiki məqamda bu qədər uzağa baxmaq çətin olsa da, həmin turniri səbirsizliklə gözləyirəm", - deyə mütəxəssis bildirib.
Qeyd edək ki, İngiltərə iyulun 19-da, Bakı vaxtı ilə saat 01:00-da üçüncü yer uğrunda görüşdə Fransa ilə qarşılaşacaq.
