Idman.biz
"Qarabağ"la Almaniyanın "Ayntraxt" klubu arasında futbol üzrə Çempionlar Liqasının əsas mərhələsinin oyununa təyinat alan isveçrəli hakim Sandro Şerer Ağdam təmsilçisini çox yaxşı tanıyır.
İdman.Biz-in məlumatına görə, 2015-ci ildən FIFA referisi olan təcrübəli isveçrəli hakim Qurban Qurbanovun komandasının iştirakı ilə oyunu artıq dördüncü dəfə idarə edəcək. Doğrudur, əvvəlki üç halda Şerer "Qarabağ"ın səfər matçlarında baş hakim kimi çalışıb.
Belə ki, o, 8 noyabr 2018-ci ildə keçirilmiş UEFA Avropa Liqasının 2018/19 mövsümünün qrup mərhələsində "Vorskla" (Ukrayna) – "Qarabağ" (0:1) matçının baş hakimi olub. Bundan başqa, UEFA Avropa Liqasının 2019/20 mövsümünün seçmə mərhələsinin pley-offunda 22 avqust 2019-cu ildə baş tutmuş "Linfild" (Şimali İrlandiya) – "Qarabağ" (3:2) qarşılaşmasını da o idarə edib.
Sandro Şerer həmçinin 5 noyabr 2020-ci ildə keçirilmiş UEFA Avropa Liqasının 2020/21 mövsümünün qrup mərhələsində "Sivasspor" (Türkiyə) – "Qarabağ" (2:0) oyununun baş hakimi olub. Bununla yanaşı, isveçrəli referi "Ayntraxt"ın iştirakı ilə keçirilən heç bir matçı baş hakim qismində idarə etməyib.
"Qarabağ"ın oyunları ilə yanaşı, Sandro Şerer beynəlxalq arenada Azərbaycan komandalarının iştirakı ilə keçirilən digər qarşılaşmalarda da hakimlik edib. O cümlədən, 9 sentyabr 2019-cu ildə Bakıda baş tutmuş Avro-2020-nin seçmə mərhələsi çərçivəsində Azərbaycan və Xorvatiya milliləri arasında keçirilən (1:1) matçın baş hakimi olub.
Xatırladaq ki, "Qarabağ" - "Ayntraxt" matçı çərşənbə günü, yanvarın 21-də Tofiq Bəhramov adına Respublika stadionunda keçiriləcək və Bakı vaxtı ilə saat 21:45-də başlayacaq.
