Sport24.az
I Liqada mövsüm başa çatdı. Ramiz Məmmədovun baş məşqçisi olduğu "Şamaxı"nın çempion kimi elitaya dönəcəyi heç kimə sirr deyil. 2023/24 "futbol ili"nə bir neçə gün öncə nöqtə qoyulsa da, "şirlər"in rəhbərliyi artıq yeni mövsümün konturlarını cızmağa başlayıb. Bununla bağlı Sport24.az-a müsahibə verən bölgə təmsilçisinin idman direktoru Kamran İsmayılov klubun gələcək planları barədə danışıb, transfer məsələlərinə toxunub.
- Ötən ilin bu vaxtı I Liqaya yuvarlanmışdız deyə məyus idiz. Təxminən 1 ildən sonra aşağı dəstənin çempionu kimi yenidən elitaya vəsiqə qazandız. Təəssüratlarınızı bilmək istərdik...
- İndi deyəcəklərimə ola bilər çoxları inanmasın, amma biz qarşımıza ancaq çempion olmaq hədəfi qoymuşduq. Yəni, 2-3-cü pillələrdə qərarlaşmaqla İcraiyyə Komitəsinin komanda sayının artırmasına bel bağlamırdıq. Güzəşt barədə ümumiyyətlə, fikirləşmirdik. Necə ki, ötən "futbol ili"ndə sonuncu olub əsasnaməyə görə elitayla vidalaşdıqsa, bu mövsümdə reqlamentə əsasən çempion kimi Premyer Liqaya qayıtmaqla çoxlarına göstərdik ki, güclülər dəstəsində çıxış etməyə layiqik. Sevincimizin həddi-hüdudu yoxdu.
- Söylənilənlərə inansaq, artıq elita çıxış edəcək komandanı formalaşdırmağa başlamısız...
- Hələki bir neçə gün istirahət edəcəyik. Amma nəzəri olaraq hazırlıqlara start vermişik. Görəcək işlərimiz var. Vaxtdan maksimum səmərəli istifadə edəcəyik.
- Hansı tədbirlər görəcəksiz?
- Stadionumuzda bəzi çatışmazlıqlar var. Arenanın işıqlandırma sistemi yoxdu. Qısa vaxtda bu nöqsanı aradan qaldırmalıyıq. Təbii ki, başqa problemlərimizdə var. Süni örtüyü dəyişməyi və oturacaq sayının artırmağı düşünürük. Təbii qazona keçid bir qədər vaxt və məsrəf aparacaq. Onu təxirə sala bilərik. Şamaxılılar ev oyunlarımızda bizi tək qoymur. Elə son qarşılaşmada da stadion tam dolmuşdu. Hətta oyunu ayaq üstə izləyən fanatlar da çox idi. Odur ki, oturacaqlarımızı bir qədər də artırsaq pis olmaz.
- Akademiya ilə bağlı vəziyyət necədi?
- Bildiyiniz kimi komanda elitada çıxış edərkən yarı Bakı, yarı Şamaxıda məskunlaşmışdıq. Komanda I Liqaya düşdükdən sonra paytaxtdakı aşağı yaş qrupları üzrə bir neçə komandanın fəaliyyətini dayandı, bəzilərini isə Şamaxıya köçürdük. Amma ümumi götürəndə akademiyanın özəyini saxladıq, bir neçə yaş qrupu məşqlərini davam etdirdi. Onu da qeyd edim ki, hətta aşağı liqada çıxış edə-edə Avropa ölkələrinin bəzi futbol akademiyaları ilə əməkdaşlıq barədə görüşlərimiz olub. Odur ki, akademiyaya görə narahat olmağa dəyməz.
- Transfer çalışmalarına başlamısız?
- İki-üç günə rəhbərliklə görüşümüz olacaq. Transfer və bir çox zəruri məsələləri müzakirə edəcəyik. Bundan sonra kimlərin qalıb, kimlərin gedəcəyi bəlli olacaq. Ümumi götürəndə ingilislər demiş özümüz üçün "şort list" tərtib etmişik. Hazırkı heyətlə I Liqada qarşımıza qoyulan məqsədə çatmışıq. Onların zəhmətinin üzərindən xətt çəkə bilmərik. Həmçinin müqaviləsi davam edən futbolçular var. Peşəkar klub olaraq yalnız kağız üzərindəki şərtlərə görə yox, həm də oyunçularımıza hörmət və ehtiramla yanaşırıq. Təbii ki, futbolçularla bağlı əsas qərar verəcək şəxs baş məşqçidi. Amma bir nüansı sizə dəqiq deyim ki, biz "Kəpəz", "Turan Tovuz" və "Araz-Naxçıvan" kimi komandanı dağıdıb yenidən qurmayacağıq. Belə təcrübəni təkrarlamaqda maraqlı deyilik. Odur ki, heyət tam dəyişməyəcək, komandamızın onurğa sütunu hesab olunan futbolçuların əksəriyyəti komanda da qalacaq.
ABDULLA İSMAYILOĞLU
