Sport24.az
Azərbaycan futbolunda yeni bir güc mərkəzi artıq rəsmi şəkildə təsdiqini tapdı. "Sabah" Misli Premyer Liqasında mövsümün bitməsinə dörd həftə qalmış çempionluğunu rəsmiləşdirdi.
Hazırda 72 xala malik "bayquşlar" üçün ən yaxın izləyicisi "Qarabağ"ın 59 xalı artıq yetərli deyil. Bu, təkcə riyazi üstünlük yox, həm də mövsüm boyu nümayiş etdirilən sabitliyin, keyfiyyətin və məqsədyönlü işin məntiqi nəticəsidir.
Bu uğurun arxasında dayanan əsas fiqurlardan biri, şübhəsiz ki, komandanın baş məşqçisi Valdas Dambrauskasdır. Məhz onun rəhbərliyi altında "Sabah" daha baxımlı, sistemli və intizamlı futbol sərgiləməyə başladı. Komanda meydanda nə etdiyini bilən, planlı hücum quran, oyunun tempini idarə edən kollektivə çevrildi. Təsadüfi deyil ki, sona dörd tur qalmış çempionluq təmin olundu.
Heyətdə toplanan futbolçuların fərdi keyfiyyəti də bu uğurda mühüm rol oynadı. Seçimlərin düzgün aparılması, mövqelər üzrə balansın qorunması və kollektiv ruh "Sabah"ı fərqləndirən əsas amillərdən oldu. Komanda yalnız nəticə qazanmırdı, eyni zamanda azarkeşlərə estetik futbol bəxş edirdi.
Əslində, bu çempionluğun işartıları ötən mövsümdən görünürdü. Klub tarixində ilk dəfə Azərbaycan Kubokunun qazanılması Masazır təmsilçisinin artıq iddialı mərhələyə keçdiyinin xəbərçisi idi. Bu mövsüm isə həmin yüksəliş öz pik nöqtəsinə çatdı. Misli Premyer Liqasının qızıl medalları bunun ən parlaq sübutudur.
2017-ci ildə yaradılan bir klub üçün bu qədər qısa müddətdə ölkə futbolunun zirvəsinə yüksəlmək böyük idarəçilik uğuru, düzgün strategiya və səbirli inkişaf modelinin nəticəsidir. "Sabah" bu zirvəyə təsadüfən yox, addım-addım, planlı şəkildə gəlib.
Bu gün "Sabah" təkcə çempion deyil. O, Azərbaycan futbolunda yeni düşüncənin, yeni futbol fəlsəfəsinin və gələcəyə hesablanmış layihənin canlı nümunəsidir. Sözsüz ki, bu çempionluq haqq edilmiş zəfərdir. Və görünən odur ki, "bayquşlar" üçün bu, yalnız başlanğıcdır.
