Idman.biz
"Bu satış modeli azarkeşlərin hər oyunöncəsi ayrıca bilet axtarmasına ehtiyacı aradan qaldırır, onlara əvvəlcədən bütün ev qarşılaşmalarında yerlərini təmin etmək imkanı verir".
Bu sözləri "Sabah"ın mətbuat xidmətinin rəhbəri Elnur Həmidov UEFA Çempionlar Liqasının əsas mərhələsində komandanın ev oyunlarına azarkeş marağından danışarkən İdman.Biz-ə açıqlamasında bildirib.
"UEFA Çempionlar Liqasının əsas mərhələsində keçirəcəyimiz ev oyunlarına azarkeşlər tərəfindən böyük maraq göstərilir. Satışın ilk mərhələsində təqdim olunan biletlərin qısa müddətdə alınması da bunu bir daha göstərir", - deyə Həmidov söyləyib.
Dörd ev oyunu üçün biletlərin vahid formada satışa çıxarılmasında əsas məqsədin Çempionlar Liqasında "Sabah"ın bütün qarşılaşmalarını stadiondan izləmək və komandaya hər oyunda dəstək olmaq istəyən azarkeşlər üçün daha əlverişli imkan yaratdığını bildirən matbuat katibi dörd qarşılaşmaya giriş imkanı verən biletlərin Çempionlar Liqası səviyyəli oyunlar üçün münasib qiymətə təqdim olunmasının da məhz azarkeşlərin maraqları nəzərə alınaraq müəyyənləşdirildiyini vurğulayıb:
"Bu satış modeli azarkeşlərin hər oyunöncəsi ayrıca bilet axtarmasına ehtiyacı aradan qaldırır, onlara əvvəlcədən bütün ev qarşılaşmalarında yerlərini təmin etmək imkanı verir. Xüsusi olaraq qeyd edim ki, biletlər tükənməyib. Satış prosesi daha çox azarkeşin bilet əldə edə bilməsi və sistemdə yarana biləcək sıxlığın düzgün idarə olunması məqsədilə mərhələli şəkildə həyata keçirilir.
Klub olaraq azarkeşlərimizin göstərdiyi böyük marağı yüksək qiymətləndirir və anlayışlarına görə təşəkkür edirik. İnanırıq ki, Çempionlar Liqasının bütün ev oyunlarında tribunaları birlikdə dolduracaq və komandamıza güclü dəstək verəcəyik".
Qeyd edək ki, tarixində ilk dəfə UEFA Çempionlar Liqasının əsas mərhələsində çıxış edən "Sabah" evdə "Barselona", "Borussiya Dortmund", "Napoli" və "Slaviya Praqa" ilə qarşılaşacaq. Bakı təmsilçisi səfərdə isə "Arsenal", "Mançester Yunayted", "Vilyarreal" və "Vikinq"lə üz-üzə gələcək. "Sabah" ilk matçında səfərdə "Mançester Yunayted"ə 0:4 hesabı ilə uduzub.
