Idman.biz
İngiltərənin "Mançester Yunayted" futbol komandası Markus Reşfordun gələcəyi ilə bağlı mövqeyini dəyişə bilər.
İdman.Biz "The Sun"a istinadən xəbər verir ki, Britaniya mediasının məlumatına görə, klub rəhbərliyi Reşforda 14 nömrəli formanı vermək qərarına gəlib. Bu addımın hücumçuya yenidən güvənildiyini və onun əsas komandanın bir hissəsi kimi nəzərdən keçirildiyini göstərmək məqsədi daşıdığı bildirilir.
Reşford ötən mövsümü icarə əsasında "Barselona"da keçirib və Kataloniya klubunda da 14 nömrəli formada çıxış edib. "Barselona" onun transfer hüquqlarını almadıqdan sonra futbolçu "Mançester Yunayted"ə qayıdıb.
Mənbəyə görə, Avropanın aparıcı klublarından Reşford üçün ciddi təklif daxil olmazsa, ingiltərəli hücumçu 2026/2027 mövsümünü "Mançester Yunayted"də keçirə bilər. Baş məşqçi Maykl Karrikin də futbolçuya özünü yenidən sübut etmək şansı verməyə hazır olduğu bildirilir.
Reşford əvvəllər "Mançester Yunayted"də uzun müddət 10 nömrəli formanı geyinib. Hazırda həmin nömrə Mateus Kunyaya məxsusdur. Klubun rəsmi heyət səhifəsində Kunya 10 nömrə ilə göstərilir.
Qeyd edək ki, Reşford "Mançester Yunayted"in əsas komandasında 2016-cı ildə debüt edib və klub akademiyasının yetirməsidir.
