Idman.biz
İspaniyanın "Real Madrid" klubunun sabiq qidalanma üzrə mütəxəssisi İtsiar Qonsales klubda çalışdığı dövrdə qarşılaşdığı problemlərlə bağlı açıqlama verib.
İdman.Biz "Marca"ya istinadla xəbər verir ki, 47 yaşlı mütəxəssis müsahibəsində "Real Madrid"in tibbi heyəti tərəfindən qərəzli münasibətə, hətta təhdidlərə məruz qaldığını bildirib. Onun sözlərinə görə, futbolçularla işi real nəticə versə də, bu, klubun tibbi departamentində narazılıq doğurub.
İtsiar Qonsales qeyd edib ki, futbolçular onunla işlədikdən sonra əzələ qıcolmaları, əzələ ağrıları, məşq və oyunlardan sonrakı ağır yorğunluq halları xeyli azalıb. Buna baxmayaraq, tibbi heyət onun fəaliyyətini qəbul etməyib və onu klub rəhbərliyi qarşısında gözdən salmağa çalışıb.
Qonsalesin sözlərinə görə, "Real Madrid"in prezidenti Florentino Peres onu şəxsən dəvət etsə də, tibbi departament sonradan prezidenti inandıraraq ona qarşı mənfi rəy formalaşdırıb. Keçmiş mütəxəssis bu barədə belə danışıb:
"Real Madrid"in qidalanma və diet planı? Orada ümumiyyətlə qidalanma departamenti yoxdur. Mən gələndə məsul həkim dedi ki, qida və əlavələrin zədələrə və performansa heç bir təsiri yoxdur. Aşpaz istədiyi məhsullarla yemək bişirir və məsələ bununla bitir. Mənə dedilər ki, gördüyüm iş faydasızdır".
İtsiar Qonsales həmçinin klub əməkdaşları tərəfindən həyatını məhv edəcəkləri və onu mümkün qədər alçaldacaqları ilə hədələndiyini bildirib. Bu təzyiqlərdən sonra o, istefa vermək qərarına gəlib, lakin hətta bu istefanın təsdiqi üçün məhkəmə mübarizəsi aparmalı olub.
Hazırda bütün bu proseslərin geridə qaldığını deyən İtsiar Qonsales, yaşadığı bu ədalətsiz və ağır dövrü ilk dəfə tam şəkildə ictimaiyyətə açıqlamağa qərar verdiyini vurğulayıb.
