Idman.biz
Almaniya Futbol İttifaqı (DFB) 2024/25 mövsümündə azarkeşlərin qeyri-etik davranışına görə ölkənin üç ən yüksək liqasında çıxış edən klublara ümumilikdə 12 milyon avrodan artıq cərimə tətbiq edib.
İdman.Biz "Kicker" nəşrinə istinadən xəbər verir ki, cərimələrin həcminə görə liderlər sırasında Ağdamın "Qarabağ" klubunun Çempionlar Liqasındakı rəqibi olan Frankfurt "Ayntraxt"ı da yer alıb.
"Qartallar" ümumi cərimə məbləğinə görə ikinci pillədə qərarlaşıb. Frankfurt klubu azarkeşlərin davranışı səbəbindən 764 min avrodan çox cərimələnib.
Antireytinqin ilk sırasında ötən mövsüm II Bundesliqada çıxış etmiş "Köln" yer alıb. Klub 900 min avrodan artıq məbləğdə cərimə olunub. Üçüncü pillədə isə 623,5 min avro cərimə ilə "Hamburq" qərarlaşıb.
Ümumilikdə, intizam tədbirləri Almaniyanın 56 klubuna şamil edilib.
Qeyd edək ki, "Qarabağ" və "Ayntraxt" Çempionlar Liqasının əsas mərhələsi çərçivəsində yanvarın 21-də Bakıda üz-üzə gələcəklər. Frankfurt klubu bu matçı azarkeş dəstəyi olmadan keçirəcək. UEFA "Ayntraxt"ı ÇL-in əsas mərhələsinin VI turunda "Barselona"ya qarşı oyunda (1:2) azarkeşlərin davranışına görə cəzalandırıb.
