Idman.biz
"Qarabağ" futbol klubunun UEFA Konfrans Liqasının III təsnifat mərhələsində Kiyev "Dinamo"sunu mübarizədən kənarlaşdırması Ukrayna klubunun arzuolunmaz seriyasına son qoyub.
İdman.Biz xəbər verir ki, Ağdam təmsilçisinin 2:0 hesablı qələbəsindən sonra "Dinamo" son 20 ildən artıq müddətdə ilk dəfə avrokuboklarda təsnifat mərhələsini keçə bilməyib. UEFA-nın məlumatına görə, ilk görüşdə Kiyev klubu 1:0 hesabı ilə qalib gəlib.
Ukrayna təmsilçisi sonuncu dəfə 2005/06 mövsümündə təsnifat mərhələsində mübarizəni dayandırıb. Həmin vaxt "Dinamo" İsveçrənin "Tun" klubuna iki oyunun nəticəsinə əsasən uduzub - 0:1, 2:2.
Bundan sonra Kiyev komandası avrokuboklarda hər dəfə ən azı pley-off mərhələsinə qədər irəliləyib. "Qarabağ"la qarşılaşma bu seriyanın sonunu gətirib.
Bundan əlavə, "Dinamo" 1992-ci ildən sonra ilk dəfə avrokuboklarda ilk oyunda qalib gəldiyi cütdə növbəti mərhələyə yüksələ bilməyib.
Qeyd edək ki, "Qarabağ" ilk oyunda 0:1 hesabı ilə məğlub olsa da, Bakıda rəqibini 2:0 hesabı ilə üstələyərək ümumi 2:1 hesabı ilə Konfrans Liqasının pley-off mərhələsinə vəsiqə qazanıb.
