Idman.biz
Türkiyənin "Qalatasaray" futbol komandası heyətinə yeni 10 nömrə cəlb etmək üçün transfer çalışmalarını sürətləndirib.
İdman.Biz "Fotomaç"a istinadən xəbər verir ki, İstanbul təmsilçisinin əsas namizədləri "Portu"nun yarımmüdafiəçisi Rodrigo Mora və Moskva "Lokomotiv"inin futbolçusu Aleksey Batrakovdur.
"Qalatasaray" 19 yaşlı Moranın icarəsi ilə bağlı "Portu" ilə prinsipial razılığa gəlib. Razılaşmanın futbolçunun müəyyən sayda matçda meydana çıxması ilə bağlı şərtlər ehtiva etdiyi bildirilir.
Batrakov məsələsində isə İstanbul klubu Moskva "Lokomotiv"inə 25 milyon avro (təxminən 49 milyon AZN) məbləğində təklif göndərib. "Sözcü" tərəflərin bu rəqəm üzərində razılaşdığını yazsa da, digər mənbələr Rusiya klubundan yekun cavabın hələ gözlənildiyini bildirirlər.
Yekun seçim baş məşqçi Okan Buruka həvalə olunub. "Qalatasaray" rəhbərliyi hər iki futbolçu ilə bağlı hazırlanan hesabatları türkiyəli mütəxəssisə təqdim edəcək. Burukun oyun sisteminə daha uyğun hesab etdiyi namizəd üzrə transfer prosesi tamamlanacaq.
Rodrigo Mora "Portu"nun yetirməsidir və Portuqaliya futbolunun perspektivli yarımmüdafiəçilərindən hesab olunur. Batrakov isə Moskva "Lokomotiv"inin əsas futbolçularından biridir və Rusiya millisində də çıxış edir.
