Nizami Sadıqov: Berdıyevin istefası klub rəhbərliyinin qərarıdır, Turan Tovuzun zəif oyunu məğlubiyyətə səbəb oldu

"Turаn Tovuz" "Kəpəz"lə matçda çox zəif oynadı və düşünürəm ki, məğlubiyyət də bunun nəticəsi oldu. Komanda öz oyununu meydanda göstərə bilmədi". Bu sözləri Sport24.az-a açıqlamasında Nizami Sadıqov deyib.

Veteran futbolçu Misli Premyer Liqasının 3-cü turunda "Turan Tovuz"un səfərdə "Kəpəz"ə məğlub olduğu oyunu şərh edib:

"Belə qarşılaşmalarda yaratdığın qol imkanlarından istifadə etmək çox vacibdir. Fürsətlərdən yararlana bilmirsənsə, rəqibə də şans verirsən və sonda bunun cəzasını çəkə bilərsən. "Kəpəz" öz meydanında oynayırdı və azarkeşlərin dəstəyi komandanı əlavə motivasiya edirdi. "Turan Tovuz" isə bu amilləri nəzərə alaraq daha inamlı və aqressiv futbol nümayiş etdirməli idi. Amma bunu tam şəkildə görə bilmədik. Hücumda istənilən kəskinlik yox idi, yaradılan imkanlardan da lazımi səviyyədə istifadə olunmadı. Futbolda bəzən bir epizod, bir səhv və ya bir qol bütün oyunun taleyini həll edir. "Turan Tovuz"un da imkanları oldu, amma onları qola çevirə bilmədi. "Kəpəz" isə öz fürsətindən istifadə etdi və nəticədə üç xal qazandı. Ona görə də məğlubiyyətin əsas səbəblərindən biri kimi hücumdakı səmərəsizliyi göstərmək olar".

Cəfərov Kurban Berdıyevin istefaya göndərilməli olub-olmamasına da münasibət bildirib:

"Bu, mənim yox, klub rəhbərliyinin verəcəyi qərardır. Rəhbərlik komandanın nəticələrini, oyununu, məşqçinin fəaliyyətini və qarşıdakı hədəfləri daha geniş şəkildə qiymətləndirəcək. Məşqçi də, futbolçu da nəticəyə görə məsuliyyət daşıyır. Amma konkret olaraq məşqçinin istefası ilə bağlı qərar vermək rəhbərliyin səlahiyyətindədir. Fikrimcə, "Turan Tovuz" bu məğlubiyyətdən nəticə çıxarmalı və qarşıdakı oyunlarda daha yaxşı futbol nümayiş etdirməlidir. Mövsüm uzundur, amma itirilən xalların əvəzini sonradan çıxarmaq heç də asan olmur".

Qeyd edək ki, "Kəpəz" "Turan Tovuz" matçı meydan sahiblərinin minimal hesablı qələbəsi ilə başa çatıb - 1:0.