Idman.biz
Azərbaycanın "Neftçi" futbol komandasının futbolçusu Sessi D"Almeyda Lionel Messinin Argentina millisindəki vida matçında iştirak edə bilər.
İdman.Biz xəbər verir ki, 30 yaşlı yarımmüdafiəçi Benin millisinin qarşıdakı beynəlxalq oyunlar üçün heyətinə çağırılıb.
Benin yığması Afrika Millətlər Kubokunun seçmə mərhələsində Burkina-Faso və Mavritaniya ilə qarşılaşdıqdan sonra Buenos-Ayresə yollanacaq. Gernot Rorun komandası oktyabrın 6-da Argentina ilə yoldaşlıq görüşündə üz-üzə gələcək.
"Monumental" stadionunda keçiriləcək qarşılaşma Lionel Messinin Argentina millisində sonuncu oyunu olacaq.
Beləliklə, D"Almeyda meydana çıxacağı təqdirdə futbol tarixinin ən titullu oyunçularından birinin milli komandadakı vida matçının iştirakçısına çevriləcək.
Yarımmüdafiəçi 2015-ci ildən Benin millisində çıxış edir. Onun hesabında 46 oyun və 1 qol var.
Qeyd edək ki, D"Almeyda 2025-ci ilin yayında Kiprin "Apollon" klubundan "Neftçi"yə keçib. Bakı təmsilçisi futbolçu ilə 2 illik müqavilə imzalayıb və anlaşmanın daha bir mövsüm uzadılması imkanını saxlayıb.
Yarımmüdafiəçi bu mövsüm "ağ-qaralar"ın heyətində üç rəsmi oyunda meydana çıxıb. O, Konfrans Liqasının təsnifat mərhələsində iki, Misli Premyer Liqasında isə bir matçda iştirak edib. D"Almeyda hələlik məhsuldar hərəkətlərlə yadda qalmayıb.
