Idman.biz
Bakı "Neftçi" klubunun futbolçusu Sessi D"Almeyda Lionel Messinin Argentina millisində vida matçının iştirakçılarından biri olub.
İdman.Biz xəbər verir ki, yarımmüdafiəçi Benin yığmasının start heyətində kapitan sarğısı ilə meydana çıxıb və görüşü sona qədər keçirib.
D"Almeyda hələ oyunun start fitindən əvvəl Messinin təltif mərasimində iştirak edib. Kapitanların ənənəvi görüşü zamanı "Neftçi"nin futbolçusu Benin millisinin adından argentinalı ulduza xatirə hədiyyələri təqdim edib. Hədiyyələr arasında xüsusi heykəlcik və komandanın məktubu da olub.
Artıq matç zamanı rəqiblər bir neçə dəfə oyun epizodlarında üz-üzə gəliblər. 90+3-cü dəqiqədə D"Almeyda cərimə meydançasının yaxınlığında Messiyə qarşı qayda pozuntusuna yol verib. Təyin olunan cərimə zərbəsini argentinalı futbolçu özü yerinə yetirib, lakin topu qapının üstündən vurub.
Buenos-Ayresdəki "Monumental" stadionunda keçirilən qarşılaşma Argentina millisinin 3:0 hesablı qələbəsi ilə başa çatıb. Messi milli komandadakı son oyununda penaltidən qol vurub və iki məhsuldar ötürmə edib.
