Idman.biz
Misir futbol millisində Məhəmməd Salah ətrafında yaranan gərginlik ölkədə geniş müzakirələrə səbəb olub.
İdman.Biz "Digi Sport"a istinadən xəbər verir ki, 34 yaşlı hücumçu Anqola ilə 0:0 hesabı ilə başa çatan Afrika Millətlər Kubokunun seçmə oyununda 60-cı dəqiqədə əvəzləndikdən sonra yığmanın düşərgəsini tərk edib.
Misir millisinin sabiq hücumçusu Mido baş məşqçi Hossam Hassanı sərt tənqid edib və onun Salahdan açıq şəkildə üzr istəməli olduğunu deyib.
"Məhəmməd Salahın milli komandadan belə şəraitdə ayrılması hədsiz böyük fəlakətdir. Kapitanın düşərgəni bu vəziyyətdə tərk etməsi komandada xaos olduğunu göstərir. Misir millisi heç kimin oyuncağı deyil. Baş məşqçinin Salahdan açıq şəkildə üzr istəməsi artıq zərurətə çevrilib", - deyə Mido bildirib.
Hossam Hassan isə qarşılaşmadan sonra Salahın zədə səbəbindən deyil, sırf taktiki qərarla əvəzləndiyini açıqlayıb. Mənbənin məlumatına görə, futbolçu bundan ciddi narazı qalıb və federasiya rəsmilərinin onunla əlaqə yaratmaq cəhdlərinə cavab verməyib.
Misir Futbol Federasiyası daha sonra Salahın Cənubi Sudanla növbəti oyunda süni örtüyə görə dincəldiləcəyini açıqlayıb. Lakin yerli mediada bu qərarın futbolçu ilə baş məşqçi arasında daha əvvəl yaranmış gərginliyi ört-basdır etmək üçün verildiyi iddia olunur.
Mənbənin yazdığına görə, yığmanın soyunub-geyinmə otağında Hossam Hassanla bağlı narazılıq yalnız Salahla məhdudlaşmır. Omar Marmuş da daxil olmaqla bəzi aparıcı futbolçuların baş məşqçidən narazı olduğu bildirilir.
