Idman.biz
"Biz də çalışacağıq çempion olaq. "Sabah"ı da təbrik edirəm".
Bunu "Qarabağ"ın yarımmüdafiəçisi Marko Yankoviç futbolxeber.az-a müsahibəsində deyib.
Həmin müsahibəni təqdim edirik.
- Azərbaycan Premyer Liqasının üçüncü turunda "Sumqayıt"ı çətinliklə məğlub etdiniz. 1:0 hesablı qələbəni necə şərh edərdiniz?
- Həqiqətən də çətin oyun alındı. Çünki təxminən 70 dəqiqə azlıqda oynadıq. Buna baxmayaraq, xarakter nümayiş etdirdik. İlk hissənin sonunda hesabı açdıq. Fasilədən sonra da qol şanslarımız var idi. İkinci qolu vursaydıq, oyunun sonları daha rahat keçərdi. İstənilən halda nəticədən razı qalmalıyıq. Çünki qələbə qazandıq. Bu, bizim üçün vacib idi. İndi davamını gətirməliyik.
- Yeni oyunçuların çoxluğu komandanın işini nə dərəcədə çətinləşdirir?
- Bu normaldır. Çünki heyətdə xeyli oyunçu var. Heyətimiz böyük ölçüdə dəyişib. Biz də yeni gələnlərə kömək etməyə çalışırıq. Əlimizdən gələni edirik ki, onların adaptasiyası sürətli getsin.
- Hazırkı "Qarabağ"ın potensialı nəyə qadirdir?
- Komandamızın potensialı çox yüksəkdir. İnanıram ki, azarkeşlər daha güclü "Qarabağ" görəcəklər.
- Bəs bu komanda çempionluğu geri qaytara biləcək gücdədir?
- Əlbəttə. Təbii ki, çempionatda gərgin mübarizə olacaq. Hər bir komanda güclənib. Lakin bizim hədəfimiz də çempionluqdur. Motivasiyamız yüksəkdir.
- Ötən mövsüm bəziləri "Sabah"ın çempion olmasını "Qarabağ"ın Çempionlar Liqasındakı çıxışı ilə əlaqələndirdilər. Demək olar ki, indi də eyni fürsət sizin üçün yaranıb?
- Biz də çalışacağıq çempion olaq. "Sabah"ı da təbrik edirəm. İki cəbhədə mübarizə aparmaq, üç gündən bir meydana çıxmaq heç də asan deyil. Yaxşı komandadırlar. Biz də uzun illər belə oynamışıq. İndi isə fikrimizi yalnız çempionata yönəltmişik.
- Növbəti turda "Araz-Naxçıvan"la qarşılaşacaqsınız. Həmin matçdan gözləntiləriniz nədir?
- Açığı, hazırkı "Araz-Naxçıvan" haqda geniş məlumatım yoxdur. Bilirəm ki, heyətlərində ciddi dəyişiklik olub. Buna baxmayaraq, bizim məqsədimiz hər matçda qələbə qazanmaqdır.
