Idman.biz
Azərbaycan futbol millisinin hücumçusu Mahir Emreli UEFA Millətlər Liqasının D2 qrupunda Litva ilə qarşılaşmada qazanılan 1:0 hesablı qələbəni dəyərləndirib.
İdman.Biz xəbər verir ki, hücumçu matçın gözlənildiyi kimi ağır keçdiyini bildirib.
"Çox ağır, yüksək tonuslu oyun keçdi. Belə olacağını əvvəldən bilirdik. Bu üç gündə həm komanda olaraq, həm də futbolçular fərdi şəkildə özlərini oyuna çox yaxşı kökləmişdilər. Xüsusilə birəbir mübarizələrdə hiss olunurdu ki, komanda həqiqətən bir-biri üçün mübarizə aparır. Belə oyunlarda birəbir mübarizələrin çoxunu qazanırsansa, əksər hallarda bunun nəticəsini də görürsən", - deyə hücumçu söyləyib.
Emreli komandanın daha çox qol vurmaq imkanının olduğunu da qeyd edib:
"Bir qol vurduq, amma düşünürəm ki, bu gün daha çox qol vura bilərdik. Təbii ki, bunun üzərində işləməliyik. Bəzi futbolçular klublarında az oynayırlar. Mən də yay təlim-məşq toplanışında bunu hiss edirdim. Epizodlara girəndə bəzən fürsətləri qaçırırsan. Amma oynadıqca və həmin epizodlara daha çox düşdükcə bu, artıq vərdiş halına gəlir".
Hücumçu Lixtenşteynlə əvvəlki qarşılaşmanın nəticəsindən sonra Litva üzərində qələbənin xüsusi əhəmiyyət daşıdığını vurğulayıb:
"Sevincliyik, önəmli qələbə idi. Xüsusilə Lixtenşteynlə oyundakı nəticədən sonra bu qələbə çox vacib idi. Həm mental baxımdan komandaya müsbət təsir etdi, həm də bir mesaj verdi. Pis nəticədən dərhal sonra toparlanıb yenidən mübarizəyə qoşulmaq sevindirici haldır".
Emrelinin sözlərinə görə, Litva ilə matç qrupdakı ən vacib qarşılaşmalardan biri olub:
"Məntiqlə düşünəndə başa düşürsən ki, Lixtenşteynə qalib gəlsəydik belə, bu oyunda da qələbə qazanmalı idik. Çünki bu qarşılaşmada qələbə olmasaydı, əvvəlki oyunlardakı nəticələrin də bir mənası qalmazdı. Bu, çox önəmli qələbə idi. Bəlkə də qrupun ən önəmli qələbəsi idi".
O, qarşıda daha bir oyunun qaldığını xatırladaraq emosiyaları nəzarətdə saxlamağın vacibliyini bildirib:
"Ən önəmlisi belə hallarda nə həddindən artıq sevinmək, nə də Lixtenşteynlə oyundan sonra olduğu kimi çox üzülməkdir. Sakit qalmaq lazımdır. Sakit qaldığın təqdirdə ümid edirəm ki, nəticə hər dəfə gələcək".
Millinin digər üzvləri Rəhman Daşdəmirov və Rüfət Abbasov da Litva ilə qarşılaşmada əldə olunan qələbədən danışıblar.
"Vacib üç xal qazandıq. Ümumiyyətlə, xalqımızı, millətimizi, komanda yoldaşlarımı - hamını qələbə münasibətilə təbrik edirəm. Meydanda hər kəs çox əziyyət çəkdi, qələbə uğrunda sonadək mübarizə apardı. Ən vacibi də bu idi. Çünki Litva ilə əvvəlki oyunda xal itirmişdik. Bundan sonra belə bir qələbə qazanmaq çox qürurvericidir. Sevinirəm.
Psixoloji baxımdan çətin idi. Çünki hamı bizdən qələbə gözləyirdi. Çalışırdıq və şükürlər olsun ki, qələbə qazanaraq xalqımızı sevindirdik", - deyə Rəhman Daşdəmirov bildirib.
Rüfət Abbasov isə Litva üzərində qələbənin komandaya böyük motivasiya verdiyini bildirib:
"Bu qələbə bizə artıqlaması ilə təsir etdi. Çünki çox vacib idi. İnşallah, qrupda lider olub çempionata vəsiqə qazanacağıq. Qələbə növbəti qarşılaşmalar üçün əlavə ruh yüksəkliyi yaratdı. Gördüyünüz kimi, hamı çox həvəsli idi. Son oyundan sonra üzərimizdə bir qədər təzyiq var idi. Lakin buna fikir vermədik. Hamı göstərdi ki, Azərbaycanda futbol var. İnşallah, bunun ardı da gələcək".
