Sport24.az
"Qarabağ" klubunun yay transfer dönəmində yollarını ayıracağı daha bir futbolçu dəqiqləşib. Sport24.az bu barədə etibarlı mənbədən məlumat əldə edib.
"Köhlən atlar" yarımmüdafiəçi Kris Kuaku ilə vidalaşacaq.
Baş məşqçi Qurban Fildişi Sahilindən olan oyunçunu komandada görmək istəmir. Ağdam klubu yeni mövsümdə rotasiyaların çox olması məqsədi ilə həmin mövqeyə yeni futbolçunun alınması üçün çalışmalara da start verib.
Kris Kuaku yayda ya komandadan göndəriləcək, ya da Premyer Liqa klublarından birinə icarəyə veriləcək.
Qeyd edək ki, afrikalı yarımmüdafiəçinin "Qarabağ"la müqaviləsi 2027-ci ilin yayında başa çatmalıdır. 2025-ci ildə 300 min avro qarşılığında ölkə çempionuna transfer olunan Kuaku cari mövsüm yalnız Misli Premyer Liqada 12 matçda (1 qol) meydanda olub.
