Idman.biz
İtaliyanın "İnter" futbol klubunda Federiko Dimarkonun gələcəyi ilə bağlı qeyri-müəyyənlik yaranıb.
İdman.Biz xəbər verir ki, 28 yaşlı müdafiəçi klubla yeni müqavilə barədə hələ danışıqlar aparılmadığını açıqlayıb.
Dimarko müqaviləsinin uzadılması ilə bağlı suala belə cavab verib:
"Təəssüf ki, bu barədə danışmamışıq. Ötən mövsümdən sonra bunun baş verəcəyinə ümid edirdim".
Futbolçunun "İnter"lə hazırkı müqaviləsi 2027-ci ilin yayına qədər qüvvədədir. Klubun anlaşmanı daha bir il, 2028-ci ilə qədər uzatmaq hüququ da var. Dimarko ötən mövsüm A Seriyasında yeddi qol vurub və 18 məhsuldar ötürmə edib.
"Tuttosport"un məlumatına görə, "İnter" yayda futbolçuya olan maraqları geri çevirib. "Mançester Yunayted" mövsümlərarası fasilənin əvvəlində Dimarko ilə maraqlanıb, avqustun sonunda isə "Barselona"nın onunla bağlı vəziyyəti araşdırdığı bildirilib.
Hazırda illik təxminən dörd milyon avro (7.9 milyon AZN) qazanan Dimarkonun yeni müqavilədə maaşının ən azı 5 milyon avro (9.9 milyon AZN) və bonuslara çatdırılmasının gözlənildiyi qeyd olunur. Tərəflər arasında mümkün yeni anlaşmanın 2029 və ya 2030-cu ilə qədər nəzərdə tutulması mümkündür.
